Ром. На цыганском языке (диалект русска рома)

– А тумэ лакэ на пхэнэнти?

Будулаё невесело засандяпэ:

– Сыр же мэ, Ваня, лакэ пхэнава, если амэ ласа сарэса на ракираса? Состыр ёй пал трин вёрсты ман обджял.

– Тумэ на холясон. Ада ла дро тэрныпэ здарандэ.

– Мэ на холясовав. Дасаво право мандэ нанэ.

– Ада ёй кочетки…

Молотко зашылыя дро фано тэло псикоса Будулаёстэ.

– Тыри дай?

– Аи. Ёй и могилка дуй молы дро бэрш укэдэл. Ангил маёса и октябрёса.

Ёв отчюдя молотко и щипцы дрэ строна. Сави – то тревога заползиндя лэскэ дро ило.

– А ту на джинэс, Ваня, состыр ёй дякэ кэрэл?

– Ракирэл, со накуч, кэдэ ачелпэ могилка сарэса без присмотра, – и повториндя:

– Только тумэ на ракирэнти лакэ. Ёй на камэл, собы кон джинэлас. Ракирэл, накуч тэ шарэспэ рэндэнца. На пхэнэнти?

– На пхэнава, Ваня.

– Честное комсомольское?

Будулаё засандяпэ. Дро якха ясва.

– Со – то мэ на дыкхтём комсомольца с дасавэ бродаса, сыр мандэ.

– Са екх. Мэ кэдэ ракирав лакэ секрето, ёй дэл мангэ комсомольско лав.

– Честное комсомольское! – наковлэс пхэндя Будулаё.

Эна, сави Клавдия! А дро хуторо, сыр поселился, лэскэ ракирэнас, со характеро латэ невозможно. Ёв и англыдыр дыкхэлас, со ада нанэ дякэ. Взрипирдя, кэдэ случаёса удыкхтя лакиро муй дро одова моло про дром. Не мог адякэ тэ обхохавэлапэ.

– Лачи тутэ дай, – пхэндя Будулаё.

Сыр всегда Ваня зарикирдяпэ дрэ кузня и явья, кэдэ дай уже притрадыя. Сыс удивление, со ёй не только смирилась, нэ и интересовалась, со ёв одой кэрэл. И дрэ адая бельвель, скэдэл лэскэ хабэ, засандяпэ, удыкхтя, сыр трито моло подчидэл пэскэ дро чяро барщо.

– Со же ту одой кэрэс, если кастрюли барщо набут?

Нанэ гадякиро рэндо тэ спучел со кэрэнас мурша дрэ кузня.

– Разно.

Ёй подыкхтя прэ лэстэ. Ёв сарэса взросло, буг’лэпсикэнгиро. Кана тэлэ смугло цыпа кхэлэнас мускулы сыр у Царькова.

– Сыго дай тукэ явэла не нужно. Уже кана исы секреты латыр.

Ёв г’аздыя прэ латэ якха:

– Дае!

Ёй засандяпэ, г’аздыя упрэ указательно ангушт и посовлахадяпэ:

– Честное комсомольское!

Ваня роспхэндя лакэ пало рэндо, саво лэскэ допатя Будулаё. Палэ грэндэ, дуй скэрдя, тритонэс кэрэл, ачьяпэ екх. Прэ сарэ штар вэнглы. Ачьяпэ екх буты, сави камэл тэ кэрэл чёраханэс Будулаёстыр. Помангья нэво лав, нэ удыкхтя, со дай засандяпэ вымученно, забеспокоился.

– Со туса? Ту на занасвалыян?

– Нат… нэ мангэ, чячё, со – то на дякэ… Со – то дро шэро марэл. Перетатькирдём шэро кхамэстыр дадывэс.

– Ту джя, пасёв сыгэдыр! Мэ кокоро саро скэрава.

И ёй кандыя, угэя дрэ соседнё штуба. Пасия прэ постель, муеса кэ ванта.

Ратяса лэскэ посыкадыяпэ, со ёй ровел. Ёв г’аздыя шэро, покхардя:

– Дае!

Ёй ничи на пхэндя, и ёв подуминдя, со лэскэ ада посыкадыяпэ.

Утроса Ваня спучья Нюркатэ:

– Ту ничи нашундян ратяса?

– Нат. Мэ атася кхэлдём прэ тацплощадка. Явьём, и екхатыр засутём сыр умарды. А со?

– Нат, ничи, – пхэндя Ваня.

Ваня подуминдя, со лэскэ действительно посыкадыяпэ. Пригэя ко выводо, со дай могла расстроиться, кэдэ уг’алыя, сыр Будулаё переживает со нашадя ромня. Решиндя ада тематыр тэ уджял. Нэ про удивление ёй кокори спучелас сыр джял буты, дур ли жыко концо. Камэлас тэ джинэл сарэ подробности, сарэ мелочи. Лэскэ льстило, со дай интересуется, ракирэл лэса сыр муршэса. Ёв ракирэлас, со буты подгэя кэ концо. Уже сы и штарто грай, ачьяпэ калитка. Пал секрето Будулаё ещё на джинэл. На локхэс тэ г’аравэл секрето. Кузня тыкны. Нанэ кай тэ г’аравэл. Минуты стардя, кэдэ Будулаё отгэя кузнятыр.

– Ада ту шукар придуминдя, – ракирэлас дай уважениёса.

Ёй спучья со ракирэнас ёнэ ещё Будулаёса. На можинэл, со ракирэнас только пало буты. Ваня засандяпэ.

– Конечно, нат. Только честное комсомольское?

Ёй сыгэс г’аздыя упрэ ангушт.

Ваня дыкхэлас сави гожа лэскири дай, тэрны. Сыр шунэл, роскэрдя якха, романэ истории, савэ кокоро ёв ушундя Будулаёстыр. Нюрка – сыр дай. Сера барэ якха. Латыр Ваня тоже лыя честное комсомольское. Не сомневался, со зракхэла лав.

Кэдэ роспхэндя сыр Будулаё розачнэпэс Галяса, удыктя, со ясва потхадынэ пиро лакиро муй. Ёй порывисто облыя, притасадя ваняскиро шэро кэ пэскиро колын. Ёв на про сабэ здарандыяпэ, ушундя, сыр марэлпэ лакиро ило.

– Дае! Ту опять расстроилась. Мэ на лава бутыр тэ ракирав.

Ёй чямудя лэскирэ калэ якха, а Нюрка неодобрительно подкэдыя ушта.

– Нат, нат, ракир. Ясва мэ выкхосава. Просто взрипирдём, сыр кокори росачьёмпэ. Бут горё прияндя марибэ манушэнгэ… А пал мандэ тыро Будулаё на спучья?

– Нат, на спучья.

Клавдякиро муй набут потускнело.

– И никэдэ пал мандэ на ракирэл?

Ваня смущениёса взрипирдя:

– Ракирэлас.

– Со?

– Ёв ракирэлас, со ту мандэ лачи.

– Адякэ и пхэндя?

– Аи. Ту зря лэстыр дарэспэ. Ёв сарэса нанэ страшно.

– Мэ лэстыр на даравпэ. Дякэ можинэс лэскэ и тэ пхэнэс. Состыр ту лыян? Если тукэ лэса куч, палсо мэ лава тэ даравпэ?

Пал адава ёй угэя дро соседнё штуба. Кана Нюрка лыяпэ тэ дэл знаки. Ваня подыкхтя пирдал псико, и удыкхтя, со дай пашо дыкхлано. Прэ лакиро муй сыс удивление. Никон дро хуторо на ракирэлас пал латэ «лачи».

Утроса Ваня опять угэя дрэ кузня. Ракирибэна продолжались. Тэ на марэл же цэло дэвэс молоткоса пэ наковальня. Ваня, конечно же, роспхэндя Будулаёскэ, со дай сарэса переячья тэ дарэлпэ лэстыр.

– Ёй и тумэнгэ разрешила ада тэ пхэнав.

Если бы Ваня на сыс тэрно, то удыкхтя бы, со Будулаё кэ адава известию нанэ равнодушно. Ёв повеселел, и закамья тэ джинэл савэнца лавэнца ёй ада пхэндя.

– Да савэнца… обыкновенна. И ещё ёй г’ара мангэлас тэ передэл, со порты тумэ скэрэн лаче. Балычёрэ никэдэ лэн на розмарэна. Екхатыр, ракирэл, дыкхно, со мастеро.

Лэскэ доставляло удовольствие тэ передэл дасавэ лава другоскэ. Радынэлпэ, со навёл мосто машкир лэндэ.

Будулаё и Клавдия на дыкхэнас екх екхэс, нэ пирдал Ванястэ джинэнас бут екх палэ екхэстэ. Если Клавдия джинэлас пало прогимо Будулаёскиро джиибэ машкир ваврэ ромэндэ, то и Будулаё джинэлас. сыр Клавдия екджины выбарьякирдя дуен чаворэн. Лэлас пэса пало Доно. Нанэ конэскэ тэ бэшэн лэнца. Почярадя колынаса, почюдэла тэл верба, пал адава дыкхэл машкир рэндоса. Балычёрэ псирэнас. Екх моло чуть Нюрка на умардэ. Будулаё шунэлас дасавэ истории и мрачнел. Холяса марэл пэ наковальня, хай камэл тэ замарэл ла дрэ пхув.

Машкир одова, Ваня скэрдя калитка. Явья октябрьско кхамитко дэвэс. Почюдэ саро дро грузовико.

– А со ада тутэ дро гоно? – удивлениёса спучья Будулаё.

Ваня на пхэндя ни ек лав, роспхандя гоно. Одой сыс шпиль. Лолы чёргэн, сави скэрдя Ваня чёраханэс. Будулаё роснашадяпэ. Только и пхэндя:

– Чергэня, Ваня, тховэн кай могилка героенгэ…

Ваня возразил:

– Дай пхэндя, со можнэс сарэнгэ, конэс умардэ фашисты.

Будулаё не смог против тэ пхэнэл.

Оградку тховэн сыго. Потходэ штар столбы, припхандлэ ажурна решётки. Кана Будулаё удыкхтя саро, со скэрдя Ваня. Будулаёскэ посыкадыяпэ, со саструнэ грайя джидэ, кана зрискирдэпэ штэтостыр, и лыджян урдэн, сыр англыдыр лыджинэ Галякиро урдо. Будулаё отмэктя Ваняс кхэрэ, а кокоро ачьяпэ екджино дрэ фэлда паш могилка. Кана саро джиибэ сыс палал. О шатры, и ягакиро тхув…

Ёв сгэя дро хуторо паш сумерки. Мануша удивлениёса дынэ лэскэ дром. Ёв не здоровался, сыр обычно. Посыкадыяпэ, хай никонэс на джинэл. Бутыр  возмущались  гадя. Ёнэ  всегда  ракирэнас, со ёв мануш культурно, а кана… Сави оса лэс удандырдя, со даже дром на дыкхэл?

Лэскэ сыс са екх, со подуминдлэ мануша. Г’аздыя шэро, обдыкхтяпэ. Да ада же Клавдякиро кхэр. Сыр ёв адарик явья? Кхэр тэрдёл прэ окраина. Екх фэнштра дыкхэл про винограднико. Откэрды. Только локхи занавеска. Пал локхи занавеска зоралэс ракирэн. Джювлякирэ глося. Екх – клавдякири, ёв уг’алыя, вавир сыс пхурьякири, грубо. Не сразу уг’алыя, кон ада. Будулаё ушундя ракирибэ, и ёв лэс заинтересовал. Ачьяпэ.

– Трушыл прэ тутэ нанэ, пхури! – пхэндя Клавдия.

Пхурьякири глос сыго пхэндя:

– Нат, мэ болды сом. А ту биш бэрша, сыр на джинэс дром дрэ кхангири. Ту ман на ладжякир! Кэ амэ рашай кажно бэрш сарэ вэнглы освящает, а вот ту икону дро сараё улыджиян. На куч. Мандэ ничи на сг’аравэса. Мандэ якха пхурэ, нэ якхитка мангэ на чейно тэ лыджяв.

– Мэ лынаскиро уже сарэн племяннонэн балычёрэн отдэём! Дуйен бакрэн. Последнёнэс балычёрэс тэ отдав, со ли? – спучья Клавдия.

Будулаё ушундя кхиныпэ, холы, бизоралыпэ дрэ Клавдякири глос. Лэскиро ило стасадя. Ёв полыя, со Клавдякэ приджялпэ тэ терпинэл сави – то обида, а ёв на можинэл лакэ помочь.

– А мэ прэ лэстэ не зарюсь. Хохаибэ кэрэс прэ мандэ.

Будулаё уг’алыя глос. Неужели ада ёй, холямы, хоханы пхури? Состыр исы власть прэ латэ вздорно пхурьятыр Лущилихи, кэдэ сарэ ваврэ мануша г’ара отрисинэпэс латыр? Состыр Клавдия на сыкавэла лакэ про порого, а дро паруибэ, ракирэл ласа? И ада ёй, сыр ракирэл бухгалтеро, «бэнг дрэ индарака»? Будулаё екх моло затрясиндя бугалтерос пал гадэскиро мэнитко пал адалэ лава. Отмэктя только кэдэ одова заверил, со пошутиндя, со бутыр на лэла дякэ тэ кхарэл. «– Чуть сарэ пуговицы на обрискирдя. Латхтя, пал конэс тэ заачьелапэ! Ромны лэскэ, или невеста?» – холямэс пробубнил тэл о накх пэскэ бухгалтеро, оправлял одёжа. Клавдия лэскэ на сыс невеста, ромны. Нэ савэ – то непонятна чувства кэ ёй сыс.

– Ту же джинэс, со мандэ дуй чаворэ!

Пхури сыго пхэндя:

– Сыр мангэ тэ на джинав!

– Мангэ чейно лэн тэ чяравав!

Пхури сыгэс согласиндяпэ:

– Мэ тырэ чаворэнгэ нанэ враго.

– Кэ тумэ кана дуй балычё про откормо. Карик тумэнгэ ещё дуен балычёрэн? Опять тыро ром про тарго улыджяла.

– Ада, Клава, нанэ тыри забота. Про тарго, или кокоро схала, – холямэс пхэндя пхури. – И балычёрэс тырэс на чейно. Ту утроса уштыян нанэ одоласа г’эраса? На камэс ман тэ полэс, со мэ тукэ ракирав. Тукэ можнэс дуен балычёрэн и пал Доно тэ лэс. Кон лэн одой гинэл? Толи кай дро вэш унашлэ, толи утопли дро Доно. Патяибэ тукэ исы. Ту только вылыджя лэн дро гоно кай брэго, а миро папу, сыр явэла рат, закэдэла лэн. А камэс – пирдал ветеринаростэ. Лэскэ дэса поллитра, ёв акто и прэ балычендэ подчинэла.

Даже Будулаёс дасаво предложение холякирдя. Ёв подуминдя, со ёй вытрадэла пхурья кхэрэстыр. Не сомневался, со Клавдия дякэ и скэрэла. Нэ ёв ушундя:

– Ту же джинэс, со ада тэ мангэс бесполезно.

– Ту забистырдян, Клавочка, сыр амэ туса г’арадыямпэс дрэ кукуруза?

– Нат, ада мэ куч рипирав!

– Нэ, кели забистырдян, сыр амэ джясас мимо размарды кибитки, и ту латхтян…

– И ада мэ на забистырдём.

– А если, пхэнаса, и ёв сыр – нибудь уджинэла, со ту одой латхтян?

Будулаё сыс тэрдо сыр вкопано. Нисаво зоралыпэ кана не могла сдвинуть лэс штэтостыр. Лэскиро ило замардяпэ тревожнэс. Ёв вздрогнул годлатыр, сыр от выстрела паш кан. Клавдия бутыр на дарэласпэ, со кон – то ушунэла ла:

– Вон кхэрэстыр, армандыны пхури! До саво времё мэ лава страдать?! Состыр?!

Лущилиха здарандыяпэ, залепетала:

– Ту успокойся, Клавочка… мэ просто дякэ пхэндём… мэ пошутиндём…

Ёй явно на дужакирэлас дасаво ракирибнаскиро исходо. Камэлас исправить, нэ плотина сыс рискирды.

– Джя, ракир лэскэ! Мэ ужэ нисостыр на даравпэ! Мэк и ёв джял терзать ман! Ту ман уже обобрала жыко последнё тхав! Вон, армандыны пхури, а то мэ тут…!

Со – то громыхнуло одой, Лущилиха взгодлыя, выпрастандыя кхэрэстыр. Будулаё едва успел, сг’арадыяпэ.

– Ох, Дэвла… ох, со кэрэлпэ… ох, Дэвла… – бормотала ёй.

Бельвеляса Дущилиха ракирдя пхурэса. Соседка ушундя набут. Сыс пашкашуки, а Лущилихины ракирэнас тихэс.

Пхури чяравэлас пхурэс, скэдэлас лэс про дежурство дро задонско колхозно огородо тэ ракхэл шах, помидоры, ваврэ овощи. Гавитка джювля ракирэнас: «– Мэклэ бузнэс дро огородо!». Дасавэ лава подджян кэ ёв. И колхозна овощи чёраханэс бикнэл шофероскэ, и внешне поджял сыр бузно. Дасави же пего длинно бородка.

Шаркая г’эрэнца, погромыхивая чашкэнца, ройенца, Лущилиха спучья пхурэс:

– Со же кана амэ ласа тэ кэрас?

Ёв ничи на пхэндя. Соседка джинэлас, со последнё лав ёв ачявэл пхурьякэ. Ёв гинэл, со пхурьякиро шэро сыр министерско. Только поддакивал лакэ. Прилипнув кэ ванта, соседка ушундя, сыр Лущилиха потходя со – то пхурэскэ про скаминд. Подджял, чугунок, кай балычитко мас. Соседка ушундя кхандыпэ, и подкэдыя слюни… И саро времё кэ Лущилиха исы мас про скаминд!

– Штылёс! – презрениёса пхэндя Лущилиха, – А, небось, поросятинку уважаешь! А кана кай ласа?

Пхуро пхэндя:

– А, может, Пашенька, ёй ещё одова… подуминэла… кокори припрастала кэ амэ?

Лущилиха заявила:

– Сыр же! Ту бы подыкхтян, сыр ёй прэ мандэ гэя! Данда оскалила. И сави сапны удандырдя ла?

Пхуро ничи на пхэндя. Дужакирэл, кэдэ ёй кокори же и ответит прэ пэскиро пучибэ. На можинэл же и тэ хал, и тэ ракирэл. А тэ хал лэскэ сыс приятнее.

Однако, тэ кхэлэл дрэ молчанка дадывэс Лущилиха на закамья.

– Мэ тут спучьём! – и Лущилиха укэдыя чугунок, – Ухтылла! Натрескался!

Пхуро захныкал:

– Ещё тольки трошечки! Мангэ же сари рат дежурить.

Чугунок опять рисияпэ про скаминд.

– Нэ дыкх, пэ тася соб ачядян.

Пхуро пал адава подпхэндя:

– А со если, Пашенька, ещё екх моло… ада…

– Со?

– Тэ придаравэс. Ультиматумо одой…

– Саво ультиматумо? – презрениёса спучья пхури.

– Дякэ и пхэн, со ежели ёй ни одолэс… то, значит, и ваврэ могут лакирэ секреты не соблюдать…

– Али мэ не предъявляла? Мэ ж тукэ ракирав, ёй сыр цэпэстыр зрискирдяпэ.

Пхуро вздыхиндя:

– Нэ, кели ачелпэ тэ джяс кэ ёв.

Пхури сыго пхэндя:

– Мэ на джява.

– Состыр?

– Кэ ёв вздыкхиибэ пронзительно. Нат, ада ту кокоро.

– Мэ, Пашенька, занято. Мандэ ратяса дежурство, а дэвэсэ чейно тэ совав.

– Нисо. Пэ тася джя кэ ёв. Только сразу саро на вылыджя, сыр дылыно. Кэ ёв барэ ловэ, думинав, исы. Ту лэскэ понабутка откэр. На ракир сразу саро, зракх Дэвэл!

Соседке сыс дриван интересно, пал конэстэ ракирибэ машкир лэндэ. Нэ, ёй на урикирдя равновесие, пошатындяпэ, гандлады пыя вастэндыр, громыхнула прэ пхув.

Дро кхэр Лущилихи кана сыс тишина. Палэ Лущилиха зоралэс пхэндя:

– Ту дыкх, фэдыр зракх колхозно миштыпэ. Охотникэн бут. Особо палэ шоферэндэ. Ада перва чёра и исы!

– Ада дякэ! – подтвердил пхуро.

Соседка здарандыяпэ уг’алыпэ. Ухтылдя гандлады, и прастандыя одоцир, скэрдя видо, хай г’анавэл пхувитко пэскэ. Адай сыгэс лущилихаскиро шэро дро зэлэно дыкхло подыкхтя пирдал плетнё.

– Лачё састыпэн, Ананьевна! Г’анавэс?

– Г’анавав, Семёновна, г’анавав, – на г’аздыя шэро соседка.

– Кэ амэ нонешно бэрш сари пхувитко схачия. Мелкота, сыр г’ирил. На джинав, сыр лава барщо тэ кэрав папускэ.

Соседка сочуствиёса вздыхиндя. Ёнэ перечюрдынэпэс дуе лавэнца, и розгэнэпэс кэ пэ. Лущилиха пролыджия пхурэс, загэя дро кхэр, закэрдя засово. Соседка  выг’анадя  пхувитко, перелыджия дро погребо, и тоже угэя кхэрэ. Пасия дрэ пасиндлы, перекэдыя сарэн, думинэл, пал конэстэ ракирэнас Лущилиха и лакиро пхуро. Ада лакэ сыс нанэ пирэ зор. Ёй кхиныя ко мэрибэ пал дэвэс, и засутя.

Лущилиха пролыджия пхурэс, закэрдя засово. Дро фэнштра помардэ. Ёй на ушундя. Помардэ второ моло. Ёй подуминдя, со Клавдия явья. Кокори припрастандыя, приползиндя. Ёй сыс уверено, со кроме Клавдии нанэ конэскэ. Откэрдя затворо, и отшатындяпэ. Зачидо чёнытко свэто тэрдёл ром. Если бы джинэлас, конэскэ откэрдя! Удыкхтя Будулаёс, и зашылыя сыр мулы. Камэлас захлопнуть порта, нэ Будулаё локхэс оттасадя ла. Згодлыя, и чюрдыяпэ дрэ штуба, ко сундуко, кай ёнэ пхурэса ракхэнас ловэ. Камэл тэ зракхэл пэскиро барвалыпэ жыко концо.

– Успокойся, – пхэндя Будулаё, кэдэ прогэя пал латэ дрэ штуба, бэштя про табурето ангил Лущилихатэ.

– Мангэ на чейно тырэ ловэ, мэ кокоро могу тэ дав. Мангэ чейно, собы ту роспхэндян саро, со джинэс…

– Нисо мэ на джинав, – сыго пхэндя Лущилиха.

– Нат, джинэс, – наковлэс пхэндя Будулаё, – Ту полэс, пал со мэ ракирав. Нэ?

Ёв ракирэл спокойнэс, нэ исы дасавэ интонации, савэ кэрэн буты фэдыр угрозатыр. Калэ якха, савэндыр дякэ дарэласпэ Лущилиха, дыкхэнас прэ латэ дро упоро. Никонэс на сыс кроме ла и Будулаёс. Лущилиха издралас прэ сундуко, нэ са екх роспхэндя саро…

Будулаё ни екх моло на перемардя ла. Роспхэндя лэскэ, сыр дуйджинэ Клавдяса Пухляковой упрастандынэ, г’арадёнас дрэ кукуруза бомбёжкатыр. Сыр удыкхнэ романы кибитка. Ёй сыс отачлы таборостыр. Пал одова ёнэ удыкхнэ пашэ кибитка пашлы ромны, а паш латэ учё пхуром и колынытко чаворо прэ васта. Дро дасаво моменто станицатыр Раздольная посыкадынэпэс танки. Будулаё нисо на ракирэлас.

– А дурыдыр сыс… последнё немецко танко рискирдя, и затасадя кибитка. Адай беременна Клавдия и бияндя чайёрья.

Будулаё сыс бэшто. Сгорбился, зрадя о шэро. И вдруг пыя табуретостыр про пато ангил муеса, потом перерисияпэ прэ думо, вытырдыяпэ про саро росто. Ёй подуминдя, со ёв скоропостижно мэя дрэ лакиро кхэр, дико завизжиндя, чюрдыяпэ штубатыр, кхэрэстыр кэ соседка. Кэ соседка сыс контужено племяннико, и ёй джинэлас, со тэ кэрэл дрэ дасавэ случаи. Припрастандыя кэ Лущилиха, ёй пирдал зор откэрдя чюрьяса зоралэс сцеплена данда, вчидя набут тхуд. Ёв начал захлёбываться, явья кэ пэ, откэрдя якха. Сыгэс уштыя. Соселка ужасно камэлас тэ джинэл, палсо Будулаё загэя кэ Лущилиха дякэ поздно. Состыр сыс припадко? Нэ Будулаё би лавэнгиро посыкадя лакэ вастэса про порта. Со тэ кэрэл? Ёй холяса подкэдыя ушта, и выгэя. Лущилиха ринулась пал латэ, нэ Будулаё тэрдякирдя ла:

– Нат, ту мангэ нанэ саро роспхэндян! Ту  банги  мангэ  тэ  роспхэнэс со сыс дурыдыр. На дар, бутыр мандэ одова на явэла.

И опять ёй не смогла противоречить.

– Пал адава амэ Клавдяса пропасиям жыкэ бельвеле. Кэдэ джясас одолэ штэтостыр, ёй и удыкхтя лэс.

– Конэс? – пристально дыкхи прэ латэ спучья ром.

– Колынытко чаворэс. Нэ, Клавдия лыя лэс, и прияндя кхэрэ кхэтанэ чайёрьяса.

Если бы ёй подыктя прэ лэстэ, удыкхэлас бы, сыр ясва тхадынэ пиро лэскиро муй. Ада ачьяпэ ваш пхурьякэ тайна.

– Акэ, лэ, – пхэндя Будулаё, и протырдыя саво – то ковло свёртко.

– Со ада?

– Адай дэш тысяч рублей. Тысячу лэ пэскэ, а ваврэ отдэса лакэ.

– Конэскэ? – спучья Лущилиха.

– Клавдии Пухляковой.

– А сыр на закамэла тэ лэл? – спучья Лущилиха.

– Банги тэ лэл. Ада ловэ не только лакирэ. Дыкх, пхури, передэ, мэ са екх  уг’алёвава.  Пхэн  лакэ, соб  мандыр  бутыр на  дарэласпэ. Мэ скэрдём дякэ, со лакэ на чейно бутыр тэ дарэлпэ. И ту, пхури, не терзай бутыр ла. Мэк дживэл чаворэнца спокойнэс.

Лущилиха не успела тэ спучел, состыр ёй должна тэ передэл ловэ, а нанэ кокоро, и лакэ на сыс бы соблазно тэ лэл ловэ пэскэ. Но ёв уже угэя. Утроса ёй уг’алыя, со ром сарэса утрадыя хуторостыр дякэ же внезапно, сыр явья.

Прэ раннё зоря колхозно ракхибнари разминулся лэса. Ракхибнари смектяпэ пиро дром, а Будулаё велосипедоса гэя хуторостыр. Засандяпэ:

– На джинэс ещё, кон прэ конэстэ традэл…

Будулаё только скэрдя шэрэса, и прогэя мимо. Ракхибнари обрисияпэ, удыкхтя пал лэскиро думо рюкзако.

Ракхибнори не ошибся. Будулаё загэя кэ могилка, палэ латхтя якхэнца крайно кхэр. Ни сави зор на затходэла лэс тэ джял палэ. Ада сыс несбыточно. Ёв ада саро полэлас. Кана ничи не должно омрачать лэнгэ покоё, э бахт. Ёй лэн заслужила. Ёв джинэл, со чейно тэ кэрэс, собы ла никэдэ не мучил дараныпэ. А адая оградка вымакхэл би лэскиро Ваня.

Глава второ

Дро августовско бельвеле ничи не предвещало паруибэ погодатыр ко фуипэ, можно исыс извлекать выгода. Шофёро екхэ машинатыр притэрдыя пашэ кхэроро прэ минутка, приоткэрдя порта, собы ссадить пассажирку, и адай же дыя газо.

– Ракирэн, баба, тумэ мэкэн тэ ратькирэн?

– Кон ада тукэ пхэндя?

– Шофёро, саво ман прилыджия адай.

– И надолго тукэ?

– Нат, только жыко утро.

– А утроса ту со, дурыдыр традэса?

– Сыр тумэнгэ тэ пхэнав… Может, дурыдыр, а может…

– На камэс – на ракир. Мангэ чужа секреты на чейно.

Гади сыс неразговорчиво, и хуланы бутыр ничи на спучья. Торопиться нанэ карик. Закамэла – кокори распхэнэла.

– Мэ мардо лава, Простыня и наволочка чиста. Мэ стиринав саро каждо моло.

Гади пхэндя:

– Куч.

– Если дрого тукэ – пирдал дуй кхэра Анфиса Мягконосова лэл панчь-дэш г’асрин, телевизеро нанэ. Могу тэ пролыджяв.

– На чейно, баба.

– Нэ, проджя. Сыр тут кхарэн?

– Кхэрэ кхарэн Петровна.

– Ваш Петровна ту тэрны. Скицик бэрш?

Приезжо гади ничи на пхэндя. Хуланы попеняла:

– Скрытно ту. А мэ камам тэ поракирав. Мангэ ваврэс нашты. Екджины. Иначе бы и на мэктём никонэс. Одой поракирава, адай… уджинэса сыр мануша дживэн. Тэ джинав бы, со ту дасави, на мэкавас бы тут кэ пэ. Нэ, ладно, Петровна дякэ Петровна. А ман кхар Макарьевна. Может, ту камэс дромэстыр тэ откхинёс? Койка исы. Палэ труба спокойнэс, ничи на дыкхно. А одой, пал занавеска, трин штэта вашэ гаджэнгэ. Пал ванта мандэ постоянно дживэл тэрны ромнори. Нэ кана кхэрэ нанэ.

Приезжо обрисия муй кэ хуланы. Адая успокоила ла:

– Да ту на дарпэ! Мэ тоже англыдыр ромэндыр дараваспэ. Подыкхтём, а машкир лэндэ исы разна мануша. Притрадынэ бут. Исы и бикхэритка, чёра. Кана поприсыклынэ, от’ячнэ. Тэ зумавэн джяна дрэ ваврэ штэта. Нэ мири квартиранточка Настя вавир. Грамотно. Ловэ ангил пал чён дэл. Да ту на ладжя, если кхины, пасёв.

– Мэ нанэ кхины.