Адамга туулган жери ыйык. Канча пенде алыста жүрүп туулган жерин сагынат. Көңүлүндө эргип ыр жазат. Ошондуктан бул китептеги ырлар ошол сагынычтан жаралса керек. Туулган жерге болгон сагыныч көзгө көрүнгөн буюм эмес. Ал адамдын жүрөгүндө кенч сыяктуу бекем катылып жатат. Аны адам өмүр бою жүрөгүндө бекем сактап ала жүрөт. Ошондуктан туулган жерге болгон сагыныч ыйык ыр же куш болуп учуп жүрө берет. Ал элес мындай чыкканда, туулган жерден алыстаганда пайда болуп, куш сымал абада калкылдап учуп турат. Андай ыйык куш ар бирибиздин жүрөгүбүздө бар. Ошол куш сайрап ыр жаратып жатса керек.

***

Үрүл-бүрүл бабалардын карааны,

Бул дүйнөдө аны кармай аламбы.

«Байкоо салып, көз жибер,-дейт алыска»

Баян айткан аңгемечи чал дагы.

Көз жиберсем Саманчынын жолуна

Бабалардын доошу келе баштады.

Дайым тынбай ыр артынан ыр жазып,

Дал ошентип жараткамын дастанды.

***

Айланайын Көкө Теңирим! Ала-Тоом – арка белим! Туулган Жерим – касиетүү мекеним. Ата-Бабам конгон конуштарым. Көпөлөк кууган адырларым, кырларым, мен кечип өткөн сайларым, ата-бабам өткөн жерлерим. Адам пендесинин төрөлмөгү бар, өлмөгү бар, тагдырдын жазмышын көрмөгү бар экен. Жалган дүйнөгө бир жаралдым. Келдим да ыңаалап үн бердим. Ал жышаана мен келдим, туулган жер өзүң күтүп ал, деген белгим. Ошентип өмүргө аттандым. Ак калпак кийип атам турду жанымда, ак элечек кийип энем турду кашымда, бакыт каалап бабаларым турду жанымда. Теңирден үн эшитилип турду: « Дүйнөгө бир жаралып келген соң, ак жана тунук жаша, тирүү пендеге тырмактын карасындай жаманчылык кылба! Адамдардын каргыш илкишине калба! Алар да сендей пенделер».

Кыямтат кайым ойлор адамдарга бүлүк салбасын! Кудайым ошондон сактасын! Эл-журт аман болсун, алардын амандыгы биздин дагы амандык. Өзүңөрдү ойлобой калайыкты ойлогула! Ар дайыма түз жолдо болгула! Айланайын Көкө Теңирим! Түбү түктүү ыйык Мекеним! Жаратканды сыйлаган сыяктуу пенделердин эмгегин, күч-кубатын, мэримдүүлүгүн, тазалагын баалайлы. Жакшылыкты баалайлы, урматтап сыйлайлы. Ааламда мен жалгыз эмесмин. Мен сыяктуу силер да жалгыз эмессиңер. Бири-бирибизге ак үмүт каалап, бир бололу! Биримдиктен бакыт жаралат. Элди бакыт аралайт. Мендеги бакыт элдики, элдеги бакыт меники. Эркин соккон тоо-талаанын шамалы, мага бакытты алып келгиле! Мендеги жакшылыкты башкаларга да бергиле! Ак калпакчан аталар, ак элечекчен энелер, ак кар баскан Ала-Тоосунда кылымдар боюу көч көчүрүп келетат. Көчүргөн көчү башка элден артта калбасын. Манас атанын арбагы сактасын! Эл аман болуп, журтка

жаманчылык келбесин. Бул китепти жазаарда жараткан кудайыма жалбарып алайын. Бул китепти жаздым. Аны ким окуйт; ким окубайт, ал тагдырдын иши. Бул китепти кантип жазбай коёмун. Киндик каным тамган жерди кантип унутайын. Эки тоонун ортосундагы айылымды кантип унутам. Караандары далдайган, элеси жүрөгүмө сиңип калган, Иймек, Котур-Төр, Арпа –Тектир, Ат –Жайлоо, Чоң-Таш жана башка жерлерди кантип унутам. Ошол жерде өнүп-өскөн жердештерими эстегенде, бул китепти окуганда алардын элеси көз алдыма даана тартылып келет. Тартылып келе берет.

***

Элдин көзү мени көрүп турат. Менин көзүм да элди көрүп турат. Мага кээ бириңер жакшы бакыт кааладыңар, аныңарга ырахмат. Жаманчылык санасаңар аныңарга капа болбойм, колуңардан келгениңер ошол экен. Ар бир пенде пейлинен тапсын. Туулган жерде эгин сугарып, мал бактым. Анын адыр түзөңүн кыдырып, кубат алдым, сергип калдым. Эл сыяктуу жашайын деп, үй салып, дарак тиктим. Дарагым мөмө байлады, куш конуп сайрады. Сыйкырдуу үндөрдү угуп, ырахаттандым. Дарактын мөмөсүн балдарым колун сунуп жеди. Аш болсун, самаганым ошол болчу. Бул дүйнөнү байкап ыр жаздым, самаганым ошол болчу. Ар бир пенде колунан келгенин аткарганы парз окшобойбу. Адамдарга аз эле өмүр берилет экен. Ошонусу арман тура. Ошол өмүрдө бир нерсени калтырып кетейин деп бел байлай чыктык. Биз өмүргө бир келген жолоочу экенбиз. Жолоочу жөн кетпей бир жакшы нерсени бүткөрүп кетсин. Анын жашоодогу парзы ошол окшойт. Жолдо бараткандар каңгырап бош кетпей, бир жакшы иш бүткөрүп кетсин. Өзүнүн өмүрүнүн бош кеткенин эстеп, капага батып азап чекпесин. Ошону эстесин. Кулагыма сыйкырдуу үн угулду, ата бабанын үнүн эшиттим. Туулган жер балалык өткөн аймакты карап, көзү өтүп кеткен жакындарымды, жердештеримди эстеп кайрадан-кайра ойго батам. Аларды эске салбаганда эмне кылат элем. Бир өмүр аяктаганда алардын катарына биз да барып кошулабыз. Жаратканымын мыйзамы ошондой, аны бизден сурап отурбайт. Аз өмүр калдыбы, же көп өмүр астыдабы, аны бир кудайым билеер. Тагдырга канча өмүр берилсе, ошого ыраазы бололу. Ага чейин кудай деп аман-эсен туралы.

От

От алоолонуп күйүп жатат. Эне жаккан от, кылымдардан бери күйүп келген от. Ошол оттун күйгөнү канча кылым, канча заман болду. Канча коломто болсо, ошончо оттун күйгөнү күйгөн. Ал отту эне тутандырат. Ак элечек кийген эне ошол оттун ээси. отту өчүрбөй тутандырып турат. Коломтодогу от, эч убакта өчө көрбө! Кыргыз очогунда от түбөлүк күйө берсин. Кыргыз очогундагы от кылымдардан-кылымга уланып күйө берсин, жылуулук чачсын. Туулган жеримдеги, өз айлымдагы энекемдин коломтосунун жылуулук табы менин эсимен кетпейт. Атам-энем, чоң ата, чоң энелерим, жакындарым ошол оттун табына жылынышчу. Азыр тамак бышып, атам коңур жагымдуу үнү менен өткөндөргө багыштап куран окуп, баарыбыз жаратканга сыйынып тамак ичебиз. Энем жаккан от, жердеги жагылган от эч убакта өчө көрбө!

Ал эми Беккулу атанын тукуму жер шарынын баардык жеринде тарап, өмүр сүрүп, иштеп жүрүшөт. Алар аман-эсенчиликте түбөлүк бактылуу болушсун! Баарынын укум-тукум улансын. Ылайым Беккулу атанын отун өчүрбөсүн! Алар ошол алыс жерден ата-энеси жаккан оттун табын эстей жүрсүн. Балалыгы өткөн жерин, кары-жашты, өз айлын унутпай эстей жүрсүн. Туулган жеринен алыстап кетпесин. Ал жакка кайра-кайра барып кайрылып турсун. Туулган жеринин ыйык тузунун даамын түбөлүк эстей жүрсүн. Ошону жарткан теңирим да каалайт жана колдойт.

***

Жараткан Эгем бир өзүң ыйыксың, өзүң улуусуң, Сенден улуу болбойт да, болгон да эмес. Биз сенин ыйык жардамыңа таянабыз жана муктажбыз.Менин алдымда рухий байлыгы талкаланган анын таза нурунан ажыраган, жаманчылыкка алданып кеткен адам турат. Ал жараткандан жана жакшы адамдардан жардам сурап, кайра жакшы адамга айланууга аракет кылып жатат. Жараткан эгем, мен десең ушул пендеге жардам бере көр! Анын жүрөгүндө уялаган жаманчылыкты акырын айдап чыгып, кайра тазалыктын, аруулуктун шооласын кийре көр! Адам пендеси алданып, жаманчылык жакка, арамзаалыкка да барат. Жараткан Эгем, анын жүрөгүндөгү жаманчылык такыр калбай жылт этип учуп кетсин. Тазалыктын ак жарыгы анын жүрөгүнө кирсин! Анын жүрөгү ошол жакшы нур менен бактылуу болуп нурданып турсун! Ошону адамдар көрүп кубансын. Бир пенденин жүрөгү жакшылык нуру менен чулганып башкаларга бакытты чачсын. Жаратканым ошол ойду кабыл кылып ага бакытты чач! Адам пендесинин өмүрү аз эле, ошонусу армандуу, ошонусу капалуу. Жер үстүндөгү баардык адамдар бактылуу болсо гана

***

Ойдо, тоодо кайың барбы,

Кыргыз балта чаппаган.

Кокту, белес, сайың барбы,

Кыргыз сөөгү жатпаган.

Байыркы кыргыз эл ыры

АК БАТА САПТАРЫ

Артыбызда калдайып

Тескей бийик тоо турат.

Алдыбызда бет жайып,

Атактуу күнгөй бу турат.

Үстүбүздө көрүнүп,

Төбөсү бийик көк турат.

Алдыбызда көшүлүп,

Төшү түктүү жер уктайт.

Эки тоонун ортосу,

Элетте пейпил жашаган,

Берешен жана бай келген,

Беккулу атадан тараган,

Көп учурду турактап,

Көнөчөк айлы бу турат.

Ата баба арбагы,

Айдыңдуу элин коргосун!

Элинин пейли ток болуп,

Эгем өзү жылоолосун!

Маанайына бийик жараткан,

Манас ата бар болсун!

Кыртыштуу жерден чогулткан,

Кырманына дан толсун.

Сапырылтып бышканда,

Сабасында саамал болсун.

Сайроонунан жарышып,

Сабалаган суу аксын.

Очок эне алоолонткон,

Коломтодон от кетпесин.

Жолдошубуз Кыдыр болуп,

Жолубуз ичкербесин.

Байгамбардын батасы,

Бай менен жалчыга,

Байымы болуп бир тийсин.

Чогултуп баккан койлорун,

Чолпон ата колдосун.

Камбар ата карышкырды,

Кабалаңда жолотпосун.

Баба дыйкан, Жер Эне,

Ата турган таң тоссун.

Ага -тууган арыздашпай,

Ар дайыма бар болсун.

Кыйын күндө оомат кетип,

Кырсык капшап жолобосун.

Куу турмушка бир келдик,

Курсагыбыз ток болсун.

Кыдырып жүргөн көңдөйдү,

Кыдыр Алей Салам бар.

Жаралгандан ак үмүт,

Жар болуп жалгашаар.

Жаман ойлуу жоголсун,

Жакшылары көп болсун.

Урмат күтүп ата-эне,

Уул үйлөп, кыз чыгарсын.

Улууларын кадырлап,

Уул-кыздары сыйласын.

Эчен кылым келаткан,

Элинен бак тайбасын.

Айдыңдуу элде аты бар,

Арбактар тынч уктасын.

Арсыз бала жаралып,

Атага наалат кетпесин.

Кары-картаң чалдардын,

Каргышынан алыс кылсын.

Атадан жалгыз туяк бар,

Андан тукум улансын.

Энеден ырыс кетпесин,

Эңсеген ойго тез жетсин.

Атадан ыйман кетпесин,

Арбакты дайым эскерсин.

Жамандын капшабы,

Жаамы журтка тийбесин.

Жакшыны кудай колдосун,

Жашоодо аман бар болсун.

Арып ачуу жоголсун,

Ачка пенде болбосун.

Ак эмгек менен жашайлы,

Бирөөнү кор кылбайлы.

Карынын баркын сактайлы,

Жаштардан ыйбаа кылалы.

Бөтөн эл тынчты албасын,

Жергеме сук артпасын.

Бугу эненин арбагы,

Уул -кызына жол ачсын.

Торгой ата айдыңы,

Тополоңдо сактасын.

Беккулу ата арбагы,

Бекемиреек чеп болсун.

Үч атадан жаралган,

Көгөртүп бак сайган,

Көңдөйүбүз бар болсун!

Көөнөрбөй аман жашасын,

Көнөчөк эли дагы аман!

Түйшүктү салбай бу элге,

Түбөлүккө бар болсун,

Түбү түктүү жер аман!

Жылдыздуу бу элди,

Жылган булут колдосун.

Көп үмүттү бул элди,

Көкө теңир коргосун!

Айлыбыз менен бир болуп,

Айдан аман чыгалы!

Жылдыздуу ойду жылоолоп,

Жылдан аман чыгалы!

Жараткан Кудайым,

Жалгамак сизден,

Кааданы күтүп,

Кабыл алмак бизден.

Оомийин!!! Жаратканым өзү жар болсун!!!

***

Санжыра жазган адамым

Кагазыңы тактап жаз.

Калпыстатпай туура жаз.

Карылардан сурап жаз!

Кабарчыдан улап жаз.

Жек жаатыңы мактабай,

Жетик билип калыс жаз!

Кагаздагы дастанды,

Кары окуйт, жаш окуйт.

«Менин бабам» барбы деп,

Мектептеги бала окуйт.

«Эң маанилүү бекемби»,

Элечекчен эне окуйт.

Кер маралдай керилген,

Келин окуйт, кыз окуйт.

Чарчап келип ат чапкан

Чабандес бала дагы окуйт.

Бу жазылган дастанды

Атасы жок бала окуйт.

Аймагынан узап кеткен

Алыстап кеткен киши окуйт.

Көңдөй жерин сагынган,

Көөнөрбөгөн пенде окуйт.

БАБАЛАРДЫН КАРААНЫ

Чоң чокулар улуу тоолор

Өткөн күнгө энчилеш.

Өктөмдүү өткөн балалык,

Өмүргө болуп шериктеш.

Далай күндөр закымдап,

Дайынсыз жылып өттү го.

Ак булут тоого калкылдап,

Ала салып көчтү го.

Көчкөндөрдүн баардыгы,

Көрүнбөй эми калды го.

Саргайтып өткөн күндөрүм,

Сагынычты чачты го.

Билинбестен закымдап,

Бийиктиктен куш өттү.

Түйшүктү салып сезимге,

Түпөйүлдүү түн өттү.

Анын баары эскирип,

Кайра сонун кеч келип,

Кайткыс күндөр эстелик.

Ак сакалын жайкалтып,

Ак бозунда чайпалып,

Беккулу деген ата өттү,

Аны менен бир болуп,

Агыны күчтүү кез өттү.

Ата менен бир болуп,

Элечекчен эне өттү.

Сорок Таш деген жайлоонун,

Зоолорун сылап жел өттү.

Өзөн суу агып күрпүлдөп,

Өмүрдү санап күн-түндөп,

Өктөмдүү өткөн жылдардын,

Өрнөгү бизге төгүлмөк.

Улууларга кездешип,

Укмуштарды сурайын.

Ушундай өткөн тарых деп,

Уламышты улайын.

Карыларга кездешип,

Качанкыны сурайын.

Кайрылбай кеткен баяндын,

Кайрыктарын улайын.

***

Алкымдын бери жагынан

Абадан ата кой жайган.

Коңгуроосу шаңгырап,

Көк эркеч барат далдайган.

Тешик-Көлдү капталдай,

Тектирди өрдөп көч жылат.

Ал көчтү Шоңко бабанын,

Тукуму сүрөп келатат.

Айтаар сөзүм бир далай,

Сатыбалды уулу Абылай,

Бордуга боз үй тиктирген,

Боор, куйрукту жеп коюп,

Боз жорго минип желдирген.

***

Бордунун чоң төр тарабын,

Көлөй уулу жайлаган.

Көлдөлөң жая салдырып,

Көөнөрбөс маек баштаган.

Асмандан бүркүт айланып,

Аталар жери шаңданган.

Айлансам да дүйнөнү,

Андай жерди таппагам.

***

Айты ата көч көчүрөт,

Көбүргөн өтөк тараптан.

Көйкөлгөн жигит көч баштайт,

Көк жоргосун алкынткан.

***

Жарашык чачып адырлар,

Жаадырап тарап гүл төктү.

Жайлоодон жылкы чубуруп,

Жаңылык чачып жай өттү.

Саргайды чөптөр муңайым,

Сары түз каптап өтөктү.

Күүлдөп аккан дайрадай,

Күркүрөп келип күз өттү.

***

Көлөй жети бир тууган,

Көлдөй болуп толкуган.

Ортоңку айыл тараган,

Ордосу кеңип байыган.

Эң биринчи энеден,

Көлөй жана Язбек.

Сейит жана Алыбек,

Айта берсе арбын кеп,

Аталардын баары бек.

***

Ак калпак кийип бөлүнгөн

Карааны тоодой көрүнгөн.

Кечөө эле биз көргөн,

Аттанып кетип сапарга,

Аталар өттү дүйнөдөн.

Ак элечек кийинген,

Ак жоргону желдирген.

«Ак кымыздан ич» деген,

Аттанып алыс сапарга,

Апалар өттү дүйнөдөн.

Келип-кеткен сапарга,

Кең дүйнөгө ким калган.

Өмүр деген байтак жол,

Ал жолдо эл каттаган.

Улуулар өтсө дүйнөдөн

Жаштарыбыз жол жүргөн

Бири келсе, бири кетип,

Бул дүйнөдө ким калган

Ушундай тура, шум жалган.

***

Мен туулган жерди карап турам. Туулган жердин ой-кырлары, жылга-жыбыты, шаркырап аккан сайлары, менин көз алдымда сүрөттөй даана көрүнүп турат. Менин түпкү бабам дагы, андан берки аталарым дагы мен сыяктуу туулган жерин карап тургандыр. Туулган жер алардын жүрөгүнө сонун сезимди чачкандыр. Карааныңдан кагылайын ыйык туулган жерим! Туулган жердин шаңы ыр болуп менин жүрөгүмө өтүп турат, жанып турат. Мага кагылайын туулган жер башкача касиет, башкача шаң берип жатпайбы. Ошону силер билесиңерби! Мен туулган жерди коёндун жатагына чейин билем. Калем алып анын ой-кырларын, кай жерин гана жөө аралабадым. Көп жылдар алыс жашасам да, туулган жердин шаңы менин жүрөгүмөн кетпей гүлдөп келет. Туулган жердин ыйыктыгын даана сезип турам. Балким ушул ыйык жер мени акын кылып жараткандыр. Ошону баамдап, касиеттүү күчкө эргүүлөнүп, тагдырыма ыраазы болом. Бул жерден менин атам сапар өткөн, анын аталары да сапар өткөн. Демек менин ата-бабам ушул жерден ак калпак кийип калдайып өтүшкөн. Туулган жердин жыбыт-жылгасы, ой жерлери, түзөң-кайкылары, урчук-урчук таштары, менин ырым, менин көрүнбөгөн касиеттүү ыр саптарым. Ошол көрүнбөгөн толкун Теңирим аркылуу менин жүрөгүмө келип, ыр таштап кетип жаткансыйт. Ошол мен жараткан жамандыр-жакшыдыр ыр шилтемдерим башкалардын жүрөгүнө кубаныч таратса болду. Жарыктык ата-бабам жашап өткөн туулган жердин ырлары обон болуп ай-ааламга кайкый берсин. Ошол касиеттүү обон башкалардын жүрөк өтун эргитип өтсүн, кубандырып бир башкача ыйык сезимге бөлөп өтсүн. Ошол ырлар Теңиримдин жардамы менен ак жашоону, качанкы бир өткөн касиеттүү балалыктын ырын, ата-бабанын жолун эске салат. Ошонусу мен үчүн табылгыс кубаныч. Ар бир башталган жакшы нерсе уланып кете берсин. Ошонусу менен ал түбөлүктүү. Ошонусу менен бул өлбөс жашоо бизге ыйык сезилет жана түбөлүктүүлүгү байкалат.

***

Кагылайын туулган жердин тургундары, биз көрүп, аралашып жүргөн замандаштар. Сиздер биздин ата-бабабыз өскөн аймакта жашап, эмгектенип келдиңиздер. Сиздердин өмүрүңөр да ошол жерде

өтүп жатат. Силер биздин ата-бабабыз өскөн жерди ээнсиретпей өмүр сүрүп, бабалардын коломтосун өчүрбөй, турмуш көчүн улап келе жатасыздар. Баарыңыздар ошол касиеттүү ата-бабабыздын урпагысыңар. Ата-бабабыздын жашап өткөн жери толук сиздерге тийешелүү.Силер ошолордун жолун улантып жатасыздар жана дагы уланта бериңиздер. Силердин жолуңарды урпагыңар таштабай уланта берсин, бул байыркыдан келаткан ата-бабабыздын салты. Силер жашаган аймактан байыркы ата-бабалардын касиеттүү үндөрүн угуп турабыз жана дагы биздин элесибизде алар биз менен жашап жаткандай доош келет. Алар ушул касиеттүү аймакта биз сыяктуу жашап, өмүр сүрүп кетпеди беле. Анан кантип биз алардын элесин унутуп салабыз. Бар болгула туулган жердин касиеттүү адамдары! Силер барда биздин туулган жерибиз эч убакта ээн калбайт жана жетимсиребейт. Силерге жаратканымдан жана ошол жашап өткөн касиеттүү адамдардын элесинен жакшы нур себилип тураарын унутпаңыздар. Ар бир адамдын жолу ар башка, ошондуктан касиеттүү туулган жердин адамдары жолугушканга, жүз көрүшкөнчө түбөлүк аман болгула! Жаратканым сиздерге кайрат күч жана өмүр берсин! Бул жакшы үмүттү аткарганга Алла Таалам өзү да эгедер болуп колдосун!

***

Эзелкинин санжырасы,

Эстелбей кетип баратат.

Улама элдин санжырасы,

Унут болуп баратат.

Карандуу элдин санжырасы,

Кайрылып качан такталат.

Биздин элдин баяны,

Билинбей өчүп баратат.

***

Байыркы биздин бабабыз,

Баарынан маек айтабыз.

Кылжырдын аты Сарбагыш,

Өңү сары, мойну ийри,

Бирок болгон жол билги,

Кыңая басчу экен дейт

Ошондон улам Кылжыр деп

Аталып аты калыптыр

Ошондон бул ат тараптыр.

***

Алты түлөк куш айланып,

Ак булут көктүн үстүнөн.

Койсойбостун алты уулу,

Алтооно көз жүгүртөм,

Белдеги жолду аралап,

Алтоо сапар жол кеткен,

Сабынан айтып тарыхтын,

Санжырачы аны эстеткен.

***

Бүтөбайдын төрт уулу,

Төрт күлүк атты алкынтат.

Төрт дайрабыз башталып,

Төрт тарапка чамынат.

Бүтөбайдын төрт уулу,

Төрт теректей дүкүйөт.

Төрт бүркүт көктө айланып,

Төрт очоктон от күйөт.

***

Ураалы деген мыкты уул,

Урааны элге тараган.

Боромбай, Босток, Табылды,

Арт, Шопок аталар

Бай атадан жаралган.

Алыскы жолго аттанып,

Атагы элге катталган.

***

Калдайган Көңдөй айлына,

Келген дейт Талас тараптан.

Жаркынбай менен Алчынбай,

Булар тукуму экен кыпчактын,

Таластан келди Садырбай,

Түзөң, кокту аралай,

Санжырасы бир далай

Тукуму Беккулу атанын,

Жашап келет жол улай,

Кайгыны бирге көрүшүп,

Кубанычты тең бөлүшүп,

Бирге көрүп баардыгын,

Кадимки Бек атанын,

Булар тондуу балдары,

Арбагын сыйлайт атанын.

Кыйлага аты таанылган,

Кырымга чейин тараган,

Кыйбай келдиң Көңдөйгө,

Кыпчак тууган аман бол!

Саруулап алыс жол жүрүп,

Саргайып келдиң Таластан.

Берешен тукум экен деп,

Беккулу уулу саа жаккан.

Арып келип Таластан,

Ит агытып, куш салган

Бек атанын жеринен,

Бейпилдик алып даарыган.

Кыр ылдый учкан кыргыек,

Кызыгып карайм бул кезде,

Кыз беришип алышмай,

Кылымдан бери сыйлашмай.

***

Түлкү өтпөс түнөк жол

Түн ичинде шыбырт мол.

Кыйлага сапар узаган

Кымбаттуум менин аман бол!

Карышкыр өтпөс кайчы жол,

Карангы жерде шыбырт мол.

Алыска сапар узаган,

Ардактуум менин аман бол!

Жоноктой кеткен кашка жол,

Жолочу кеткен башка жол.

Жол улап кетип жатасың

Жолдошум менин аман бол!

Жар бойлоп кеткен кашка жол,

Жатындаш кеткен башка жол.

Жабыгып кетип жатасың,

Жаркыным эми аман бол!

***

Атыгайдын алты уулу,

Алты күлүк таптаган.

Ат чабышта байгени,

Алабыз деп мактанган.

Алп атанын алты уулун,

Арбак колдоп даарыган

Туйгун болуп көктө учуп,

Туш-туш жакка тараган.

***

Тукумдан-тукум уланып,

Шооруктан чыккан Кошубай.

Атадан уулдар уланып,

Аңгемем жайы ушундай.

Адылдан беш уул бар үчүн,

Беш боз үй, да беш түтүн.

Беш аргымак кишенейт,

Бешөөнө беш эр минет

Беш тарапка жол кетет.

***

Кошубайдан үч уул бар,

Тоодогу үйдүн өзүнөн.

Үч жол кетет уланып,

Үч эр чыкты камдана,

Бири-биринин артынан

Чоң жүрүштү улашып.

***

Түгөл кыдыр даарыган,

Түмөнбай, Кулет бир тууган.

Бир атадан куралган,

Тукуму өсүп уланган,

Уулдары эр жетип,

Туйгун таптап куш салган.

***

Чыгаан уул аталып,

Чынгыштан: Жоомарт, Элчибай.

Эбиреп айтсам баянын,

Элимдин жайы ушундай.

Арттын уулу Саадабай,

Агылтып жылкы айдаган.

Саймалуу Төш өтөктүн,

Сайроонуна мал жайган.

Качанкы өткөн атанын

Санжырасын айтканда

Бажырайып элестин

Баяны чыгып калдайган.

***

Баястандын алты уулу

Айдың Көлдү жайлаган.

Ак шумкары колунда

Агылжым тоону айланган.

Арча бешик өңөрүп,

Апалар сапар аттанган,

Бай атанын алты уулунан

Жолдор кетип чубалган,

Бешөөнөн тукум уланган,

Сыдык ата тукумсуз,

Сыздап келип куураган,

Жараткан да тагдыр да,

Корккон жокпу убалдан.

***

Биздин Көлөй атабыз

Боз үйлөрдү көтөрүп,

Жыгачтарды кынаган,

Ууктарын жасаган,

Түндүгүн бийик көтөрүп,

Жыгач уста аталган,

Эгин эгип, мал баккан,

Эмгек менен даңкталган.

Кара көйнөк атанын,

Аты калды аталып.

***

Ар-намыстуу эмгекчил

Заты келет аталып,

Алкынтып күлүк байлаган,

Ар ишин укмуш шайлаган.

Артуу-артуу жол басып,

Ак шумкарын колго алып

Агылжым тоону айланган.

Атак даңкы кем эмес,

Алыскы даңктуу байлардан,

Ааламга кетип атагы,

Мамай деген атанын,

Маанилүү маңыз кеп айтып,

Атыгай ата таралган.

***

Кара тоонун боорунан,

Калдайып бир куш учту.

Канаттары далдагай

Кыраан экен укмуштуу.

Калдайып эл башкарып,

Канай деген эр чыкты.

Арстандай бакырса,

Айбатынан жан чыкты.

Эрөөлдө намыз бербестен,

Эч бир кепти жебестен.

Тоо жүрөк экен шумдуктуу.

***

Адырда жүргөн сүлөсүн,

Сүлөсүн дагы түлөсүн.

Күмүш жүнү жылтылдап,

Күн нуруна түрлөнсүн.

«Сүлөсүндү кармайм»– деп

Жамаке мерген жөнөсүн.

Жака кылып терисин,

Жарашыктуу эр өтсүн

***

Мен төрөлүп өскөн жерди түн буурулу каптап турат. Баардык жерде караңгылык. Айлананы аяр карап эки жакка кулак түрөм. Ушул караңгы түндөрдө, өткөн күндөрдү ойлонуп турам. Балалыгым өткөн адыр-түздөрдү таба албай турам. Бир гана Тескей Тоом, Бир гана Күңгөй Тоом далдаят. Ортосунда балалыгым өткөн Темир-Канат кыштагым калдаят. Асманда нур чапчып алыскы жылдыздар жымыңдап турат. Алар менин келечегим сыяктуу сезилет. Ушул кезде ойго батып, ата-бабанын баскан жолун эстеп турам. Алардын карааны менден эчак алыстап кеткендей. Асманда жымыңдаган жылдыздар бир нерсени сүйлөшкөндөй болушат. Балким биздин ата-бабанын сырдуу жолун сүйлөшүп жаткандыр. Түн -тынчтык, күн- күрөш ак эмгек менен эс алайын дедим. Уйкум келди уктайын. Түш көрөйүн, түшүмдө туулган жерди, энекемди, балалыгымды көрүп калаармын. Жана да туулган жерим сен да уктап эс ал.

***

Күлүктүн шүйүп куйругун,

Күндүк жерге ат чапкан.

Жан адамга көрсөтпөй,

Жабуулап жорго таптаган.

Сынчыларды алдырып,

Сыпайы гана сындаткан.

Комузчуга черттирип,

Кошуп аны ырдаткан.

Ашуу Төр, Арпа Тектирге,

Айдатып жылкы бактырган.

Айтылуу Чоң Таш жайлоого,