Адамдын Асыл ойлору

* * *

Талант бул – ачылыш менен эмгектин ортосундагы бакыт.

* * *

Талант талаада жаткан нерсе эмес, аны тапкандан кийин барктап күтүп алуу дагы көп эмгекти талап кылат.

* * *

Жашоонун өңү кызыл. Ал күрөштүн өңү. Демек жашоодо күрөшсүз жашай албайбыз. Күрөш бизге жаңы өмүрдү ачып берет.

* * *

Турмуш агып жаткан улуу дайра. Анын үнүн угуп жашоо биз үчүн керемет.

* * *

Бизде биримдик, сыйлоо, урматтоо, эмгекчилдик бар.

Демек бизде баары бар. Алар болсо биз бактылуубуз.

* * *

Жашоодо эмне төмөн, эмне жогору. Чындык, акыйкат, үмүт баарынан жогору. Коркоктук, көрө албастык, бузукулук, ач көздүк баарынан төмөн.

* * *

Жашоонун өзү жомок. Ал жомокту кандай жараттың, ал биздин чыгармачылык тагдырыбыз.

* * *

Тазалыктын өзү күзгү, анда турмуштун жаман, жакшы жактары даана көрүнүп турат. Ошол үчүн биз күзгүдөн өңүбүздү каранып тазаланып турушубуз керек.

* * *

Араа: «Даракты арааласам», – дейт.

Балта: «Даракты жарсам», – дейт.

Уста: «Үйүн салсам», – дейт.

Үй-бүлө: «Ошол үйдө жашасак», – дейт.

Демек баарынын эле жумушу жана үмүтү бар.

* * *

Жаратылыш бул өзүнчө аалам, ал эми кээ бир адамдардын жаратылыштай кенен болуп жаралышы башка пенделер үчүн чоң аалам.

* * *

Өлбөс даңктуу нерселерди адамдар жаратат. Анан ошол адамдар өлбөс даңктуу болумушка айланат.

* * *

Колум өзүнчө жомок. Бутум өзүнчө жомок. Өткөн өмүрүбүз өзүнчө жомок. Келечегибиз жарала элек жомок. Демек биз жомоктор дүйнөсүндө жашап келе жаткан экенбиз.

* * *

Кимдир бирөөнүн балалыгы оор жана кайгылуу өткөн аны эстөө өзүнчө бир кайгы жана өкүнүч. Ал ошол кайгыга жолукпас үчүн келечекте жакшылыкка умтулуш керек.

* * *

Өгөй энелердин өз энелерден бир эле айырмасы бар.

Анткени алар мээримсиз аялдар ошонусу менен армандуу.

* * *

Ичкиликти көп ичүү өкүнүч экенин билебиз. Анда эмне үчүн көп ичип жатабыз? Ошого таң калам?

* * *

Ыймандуу таза адам болуу, бул да жөнөкөйлүктүн бир жакшы нускасы. Ал жашоонун биз көрө элек жаңы нускасы.

* * *

Ар бир адам күндө жаңы кубанычты жаратып турса, анда бул аадамга жакшылык гана жаралып, адлам ошонусу менен бай болмок.

* * *

Балаңа мээримиңди чач, баардык жакшылык ошондо турат. Мээрим чача албасаң анда аталык, энелик вазыйпаң кайда кеткен? Же андан ажырадың беле?

* * *

«Өмүрүң кандай өтүп жатат?» – дейт. «Жакшы өтүп жатат» – дейм. «Армандуу жагы барбы?» – дейт. «Армансыз өмүр болмок беле» – дейм.

* * *

Ар бир адамдын таянычы анын ыйманы, кандай адам экенин кудай ошол таянычтан көрүп, билип турат.

* * *

Бир адамдын аты тарыхта калса, жүз адам сүйүнөт. Жүз адамдын аты тарыхта калса, миң адам сүйүнөт. Миң адамдын аты тарыхта калса, анда биз жашап турган аалам сүйүнөт.

* * *

Мен өзүмү-өзүм качан көрөм жана кайдан көрөм?

Жооп:

– Сен өзүңү, өзүңдүн эмгегиңден көрүп турасың. Ошону биле элек белең?

* * *

Улуу адамдар биз көрбөгөн нерселерди көрүп турат.

Алардын көз карашы бизден алдыда, ошол үчүн алар улуукту кармап турат.

* * *

Жашообуз келечек. А келечектин өзү кийинки муунга арналган ыр.

* * *

Түн – уйку. Ал эс алуучу маал. Күндүзгү күн келечекке жол алган күрөш. Ал – эмгек.

* * *

Жакшы адамдын эмгеги эсте болсун. Эсте эмес ар дайыма жүрөктө болсун. Жүрөктө эле эмес ар дайыма элде болсун.

* * *

Жакшы бала атасынын сөзүн угат. Жакшы кыз энесинин сөзүн угат. Экөөнүн сөзүн укса алар андан кийин кудайдын сөзүн да угат.

* * *

Эл башкарган жетекчи жана бийликтегилер наадан болсо, ошол эл үчүн коркунуч. Жана ар бир адамга – азап. Бул жерде бүткүд элге наадандыкты жараткан эл башчысы башкы наадан.

* * *

Күнөөбүз көбөйгөн сайын кудайды көбүрөөк эстейбиз, а эмне үчүн мурун эске салган эмеспиз.

* * *

Тозок менен бейиштин ортосу бир эле карыш экенин Наполеон өз өмүрү менен аныктап койгон. Ошол бир карыш жолдон анын өмүрү көп нерсени билип алыптыр.

* * *

Чынгызхан менен Гитлердин өмүрү бул чоң согуштун белгиси, же кыргын азап-тозоктуу өлүмдүн белгиси. Алардын өмүр баянын эскерүү да, адамдар үчүн коркунучтун белгиси.

* * *

Өлгөн күн туулган күндөн артык, себеби сен жер үстүндөгү баардык азап-тозок жана душмандарыңан кутуласың, Бирок туулган күн сен үчүн жаңы эранын башталышы.

* * *

Адамдын көзү кичинекей эле болот, бирок ач көз адамдын көзү өзүнөн миң эсе чоң байлыкты көрүп ага тойбойт.

* * *

Эл башкарып, дүйнөгө тойбогон адам өзүн жеп салуудан да кайра тартпайт. Алар дүйнөгө тойбостугунан көп адамдарды жеп салган. Башка чоочун адамдарды гана эмес өзүнүн бир туугандарын жакын адамдарын кошо жеп салган.

* * *

Кыйкырып өкүрүп коркутуу, тарбияны негиздебейт, чыныгы тарбия чындык, акыл айтуу, кеп-кеңеш боорго тарткан ишеним менен келген.

* * *

Мен асманы ачык талааны көрдүм, учуп жүргөн куштарды көрдүм, эмгектенип жаткан адамдарды көрдүм, кыскасы мен жакшылыктын элесин көрдүм. Демек мен кадимки эле айланамдагы жайнаган жакшы турмушту жана жаратылышты көрдүм.

* * *

Күн дагы жолочу, түн дагы жолочу, экөө менен жарышып бараткан адамдар да жолочу.Анда баарыбыз өмүр өткөргөн жолочу экенбиз.

* * *

Өмүрүбүз бар, жайнаган жаштыгыбыз бар, демек бизде баары бар.

* * *

Карылар карылыгы менен жаштар жаштыгы менен демек, баардыгы өз жолу менен.

* * *

Туулган жерден ата-бабалардын ыры угулат. Ошол ырлардын шаңы менин жан дүйнөмөн дагы угулат.

* * *

Ай чыккан түн ажайыптуу, ошол түндө жазылган ыр ажайыптуу, ырдын кооздугуна тийген ай нуру ажайыптуу.

* * *

Кыш бат эле өтүп, жаркыраган жаз келээрин унутпа! Оор күндөр кетип, жаркыраган кубанычтын келээрин дагы унутпа!

* * *

Калкылдап заман өттү, аны менен кошо өмүрүбүз өттү, бирок ошол өмүр калкылдатып ак эмгекти жаратып өттү.

* * *

Эмгекчилдин колу берекелүү, баатырдын жолу берекелүү, бала үчүн эненин ак сүтү берекелүү.

* * *

Күнөөлү адамды кечирүүгө болот эгер ал өз күнөөсүн мойнуна алып оңолууга багыт алса.

* * *

Күн сайын жан дүйнөсү жаңырткан адам бактылуу адам, анткени ал күн сайын жакшылыкка аттанган.

* * *

Үй-бүлөгө кереги жок адам ашыкча адам, анткени ал үй-бүлөөнүн ийгилигине салым кошпой жаткан адам. Ошол үчүн ал баардык жерде ашыкча адам.

* * *

Уламаларда, санжырада, жомоктордо айтылат: «Кудай адамга баарын берген бирок, адамдын пейли оңолмоюн өзү эч убакта оңолбойт. Бул сөздө улуу чындык жатканына ишене бергиле!».

* * *

Ата балага мээрим чачпаса, анда баласынан жакшы мээрим төгүлөөрүнө ишене албай жатам.

* * *

Кээ бир адам:«Өмүр өттү» – дейт бирок анын кандай өткөнүнө жыйынтык чыгара албай келе жатат.

* * *

Бир адам айтты: «Жашап келем бирок канча убакытты уурдап жок кылдым, кудай алдында анын эсебин так айта албайм».

* * *

Өткөн жылдарды эскерүү жакшы, бирок ал жылдардагы кемчиликти эстеп, кайра-кайра кайгыра берүү пайдасыз, анткени ал күндөр учуп кеткен куш, баары бир ал сенин колуңа кайта келип конуп бербейт.

* * *

Жандүйнөңү күндө жаңыртып жакшы алып жүрсөң, күндө бир жакшы жакшылыкка жолуга бересиң.

* * *

Жашоо бул жакшы нерсе, ал эми кандай жашадың, ал өзүңүн ишиң. Демек жыйынтыкты адам өзү чыгарат.

* * *

Күлкүчү, куудул адамдын кылыгында бир сонун жери бар, анын жараткан окуяларын эстегенде, жылмайып терең кубанычка батабыз.

* * *

Рухий байлык адамдын көзүнө көрүнбөгөн байлык мал, мүлк. акча адамдын көзүнө көрүнгөн байлык. Тирүү жанга эеөө тең керек.

* * *

Күн тийип турса деле, адам-адамдын жүрөгүнө жарык чачып турсун. Анткени жылуулук күн аркылуу эмес жүрөк аркылуу өтүп турсун.

* * *

Ар бир элде баатырлар сөзсүз чыгат. Баатыры жок элде Ата-Мекен жалгызсырайт.

* * *

Бай болгон жакшы, аны менен бирге жардыларга кайрымдуу болгону андан бетер жакшы.

* * *

Чоң кишиге баладай мамиле кылба, анткени алар балалык курактан небак өтүп кеткен.

* * *

Бактысыз кишиге жардам берип, аны бактылуу адамга айлантуу баардык эле адамдын колунан келе бербеит.

* * *

Бизге берилген өмүр бир мүнөттөн куралат, ошол бе-рилген өмүрдү сараңдык менен колдонбосок, оңой менен ийгиликке жете албайбыз.

* * *

Макал-лакап сөздөрүн бир эле киши түзгөн эмес, аны эл түзгөн. Ошол үчүн ал улуу.

* * *

Улуу адамды мактай берүү жарабайт, анткени ал мактоо курактан небак эле өткөн. Же улуулуктун өзү санат жеткис мактоо.

* * *

Улуу ойчулдар деле биздей адамдар. Бирок алардын коомго кошкон байлыгы биздикинен артык болуп жатат.

* * *

Жакшы китеп дагы чоң байлык, ал эми жакшы китептер чогулган китепкана өлбөс түбөлүктүү элдин байлыгы.

* * *

Нааданды кайра тарбиялоо өтө оор, агткени ага жабышып алган наадандыкты кууп чыгыш керек. Андан көрө жаш наристени тарбиялоо жүз эсе жеңил.

* * *

Адам бир бийиктикке жетиш үчүн эмгектенип жанын үрөйт, Анан ал бийиктикке жетет. Ал жерден дагы бийиктикке жетүүнү самаш керек.

* * *

Улуу ойчулдар жараткан учкул сөздөрдүн оюу бири-бирине окшош. Бирок алардын сөздөрү ар башкача куралган.

* * *

Көп адамдар өздөрүнүн көлөкөлөрүн баалабай өтүшөт. Ошол көлөкөсүнөн жашоонун элеси чагылып турат. Көлөкөсү тирүү жүрөм деген сыйкырдуу элес болчу.

* * *

Акылмандар деле адам. Алар бизден өтө терең акылы менен айырмаланат. Бизде бийик акыл болсо, биз деле акылман болмокпуз.

* * *

Жашообузда жакшы иштер жаралып турса, биз тирүүбүз. Анда өмүрүбүз арманга батпайт болчу.

* * *

Наадандыктын чеги бар. Акылмандуулуктун чеги жок.

Ошол үчүн ак жашообуздун жолу улуу.

* * *

Өтө күчтүү душманга бетме-бет барыш үчүн сага дагы ошондой эле күч кайрат керек.

* * *

Терең жана тунук ой жүгүртүүдөн, жакшы иштер жаралат. Биз ошонун кубанычын күтүп турабыз.

* * *

Ар бир адамга өмүр бир эле жолу берилет. Эки жолу берилсе, биз анда кеткен кемчилдикти оңдоп салмакпыз.

* * *

Ата-энеси балдарга өз сүйүүсүн берет. Балдар деле ошол мээримди кайра жакшылык менен кайырбай койбойт.

* * *

Акыл-эс жана талант менен байыган байлык жакшы, ал бизге кайрымын кайра кайрып берет.

* * *

Акылдуу адам ден-соолугуна карайт, ден-соолугу анын өмүрүн жана келечегин коргоп турат.

* * *

«Күлкүлүү окуялар бул турмушта өтө көп, бирок мен бир да жолу күлкүлүү окуяны жарата элекмин».– дейт бир мерес адам.

* * *

Күлбөй жүргөн адамдарга суктанбай, күлүңдөп шайыр жүргөн адамдарга суктанам.

* * *

Жаштык кылып жаңылганым эчтеке эмес, ошол жаңылыштыкты оңдоп салсам, андай жаңылыштыктан бир жолу кутулган болои.

* * *

Ичи тар адам ааламдын кенендигин билбей жатат, Ааламды ал өз көз карашы менен кичинекей кылып өлчөп-ченеп карап жатат.

* * *

Таланттуу акын журналист калеми менен деле эрдикке аттана алат. Алар калеми менен эрдикти жаратып жүргөн.

* * *

Кооптонуучулук болгон жерде, көңүл ордунда эмес. Адамдын

көңүлүн бир шектүү окуялар ээлеп алган.

* * *

Өмүрүндө бир китеп окубаган адам, бир жакшы нерсден, же бир сонун керемет дүйнө бар экенин билбей калган.

* * *

Сарамжалдуулук менен чогулган байлык дүйнөнүн башында турат. Баардык байлыкты башында ошол сарамжалдуулук турат.

* * *

Үнсүз ыйлаган адамда бир чоң кайгы турат. Ал кайгыны баардык адамдар сезе билбейт. Ошол үчүн ал үнсүз ыйлап жатат.

* * *

Чыныгы адам болуу деле өтө оор. Көп адамдар ошол

бийиктикке жете албай өмүрдөн өтүп жатышы арман.

* * *

Эмне үчүн биз кээ бир адамдарды улуу адамдар деп айтабыз. Алар биз ойлобогон ачылыштарды ачып жатканын улуулук деп жатабыз.

* * *

Бирөөнүн тынч жашоосуна жана эркиндигине кол сала көрбөгүлө! Аларды бактысыз жанга айлантып салбагыла!.

* * *

Дүйнөнүн өтө кенендигин жана адамдын ички дүйнөсүн терең тааныбай туруп, даанышман жанга айлана албайсыңар!

* * *

Аң сезимиңди күн сайын өнүктүрүп турсаң, ал сага келген ийгиликтин бир түрү.

* * *

Ар бир балада жакшы тарбия болсун ошентип ал күндө жакшылыкты үйрөнүп отуруп, чыныгы адам болуп чыга келсин.

* * *

Чыгармачыл адам эркин куш болуш керек. Эркин куш болуп, учуп жүрүп чыныгы чыгармаларды жарата алат.

* * *

Улгайган кезде адамга акыл топтолот. Ошол чогултуп алган нерсе менен адам бай болот.

* * *

Майда адамдарда деле ачыла элек улуу идеялар болот.

Алар ошол жаңылыгын турмушка ашыра албай калган.

* * *

Биз поэзия дейбиз. Ошол поэзия биздин жүрөгүбүзгө бир сонун өлбөс нерсени чачып жатпайбы. Ошону менен жан дүйнөбүз байып жатпайбы.

* * *

Токтоолук, талант, эмгек сапар бараткан үч жолочу. Ошол үчөө баарыбызга мага, сага, башкага да керек.

* * *

Үмүт оорулуу адамга сөзсүз керек. Эч нерсеге багынбаган оорчулукту ошол жакшы үмүт жеңип ишеничти жаратат.

* * *

Адам ар бир күндө жакшылыкты жаратып турса, ал өзү үчүн өлбөстүктү түзүп жаткан болот.

* * *

Сен эл жөнүндө ойлонсоң, эл сен жөнүндө ойлонот.

Ошондо ортодо тең салмактуулук сакталат.

* * *

Таза тунук сүйүүгө, эмгекке, талантка бөлөнгөндөр, күндө кайра жаңыдан төрөлүшү мүмкүн.

* * *

Наадандыкты наадан пенделер жаратат. Антпесе, наадан пенде болбой калган жатпайбы.

* * *

Ар бир адам өзүнчө дүйнө. Эгер ал эмгекчил, сабаттуу, маданияттуу, сылык адам болсо, ал өзүнчө кооз, кол жеткис, бизди таңданткан өмүр -дүйнө.

* * *

Дайыма китеп окуп турсаң жакшы. Жан дүйнөңө жакшылыкты ачып турган болосуң же жакшылык менен жолугуп турган болосуң.

* * *

Башыңа кайгы келгенде жеңилбе! Акыл эс токтоолугуңа таян ошондо бир жаркын иш жаралган турат.

* * *

Өз үйүң сенин кичинекей мекениң. Анда ошол жерде тынчтык, эмгек, бакубаттык уялап алган болсун.

* * *

Жаратылыш деле күн сайын жаңырып туруш керек. Демек адам баласынын жан дүйнөсү деле күн сайын жакшылыкка карай жаңырып турушу керек. Антпесе өмүрдү жаңылык аралабай эски бойдон калган турат..

* * *

Өлгөн адамдар эрдикке умтулбайт, бирок алардын тирүүсүндө жасап кеткен эрдигие тирүү адамдар таянат.

* * *

Эң мыкты романды жазган адам журтуна жазуучу эле эмес, эли үчүн өлбөс баатырдыкты жаратып кеткен адам.

* * *

Үмүт- келечек. Биз ошол келечекке карай аттанган жолочубуз. Үмүт адамды алыстан чакырып турган шам чырак. Адамдар ошол шам чыракка жетели деп, жанын сабап бараткан жолочуларбыз.

* * *

Ийгилик бул сенин ишиңдин жыйынтыгы. Ошол ийгиликке эл кубанса, анда ал биз күткөн үмүттүн жыйынтыгы.

* * *

Өтүп кеткен жакшы окуяны баары эстешет. Ошол жакшы окуянын кайра дагы жаралбай калганы арман.

Сен батаар күндү карап ойлон. Сен күндү карап эмнени ойлоносуң? Күн сыяктуу адамдарга жарык нур чачкан кезиң болду беле? Же такыр болгон жок беле? Ошону ойлон.

* * *

Үйүңдүн эшиги ачкыч аркылуу ачылат. Сенин жүрөгүңдүн ачкычы кайда? Ал сүйүүдө жана жан жыргаткан жакшы сөздө, адамды таң калткан ак эмгегиңде болуп жүрбөсүн!

* * *

Байыркы адамдар деле сүйүү деген. Азыркы адамдар деле сүйүү дейт. Адам жашап турганда мунун аягы бүтпөс нерсе шекилдүү.

* * *

Ийгилик сага оңой эле келе койбойт. Анын уңгусунда күрөш менен ишенич жатат.

* * *

Ар бир башталаар окуянын уңгусунда чындыктын жатканы эң сонун нерсе.

* * *

Адам канчалык таланттуу, сабаттуу болсо, ал ошончолук бийиктикте турган адам.

* * *

Ата-эненин эмгегин баалаган бала адам сыйын унуткан эмес.

* * *

Адам канчалык зулум болсо, анын жүрөгүндө ошончолук ыпластык жашап жатат.

* * *

Мугалим балага сабакты эле үйрөтпөйг, жүрүм-турум эрежелерин адамдар сезбеген жаркын шоолаларды үйрөткөн чыныгы насаатчы.

* * *

Өтүп кеткен өмүр арман, анткени аны ошондой кылып кайра баштай албай калганбыз.

* * *

Адептүүлүк кайдан башталса, чыныгы жашоонун өчпөс нуру ошол жактан тийип турат.

* * *

Күмөн саноо ишенимдин ишке ашпастыгынан келип чыккан..

* * *

Дүйнө-мүлккө берилип кетип элин карабай калган жетекчинин Ата Мекени- байлык, алтын болот.

* * *

Сен керексиз нерсеге илешпей керектүү нерсеге илешсең жашооңдо натыйжалуу окуялар башталат.

* * *

Калпычы адамдын убада бергени ар дайыма шек туудуруп, ишеничке жалгашпай кыйгач кетип жатат.

* * *

Өткөн өмүр – арман анын жаманы да, жакшысы да кайра келбейт, ал эми алдыңкы күнүбүз – кубаныч, анткени биз алдыңкы күндө жакшылыкка жетсек деп жашап жатабыз .

* * *

Улуулуктун уңгусунда өлбөстүк жатат, анткени улуулукту өлбөстүк жаратат.

***

Опурталдуу ишке аттанган адамдын жүрөгүндө, сөзсүз тобокелчилик бар.

* * *

Бала атасына «Атаке!» – деп эркелейт. Атасы баласынын чачынан сылап «Берекем» – дейт. Антпесе экөөнүн ортосунда кантип ысык мээрим жаралат.

* * *

Адам жаралган анын артынан мээрим жаралган. Андай болбосо, дүйнө ушунчалык кооз жана көркөм болмок эмес.

* * *

Күн нуру жерге кандай жылуулук чачса, адамдар деле бири-бирине ошондой мээримди чача алат.

* * *

Эң биринчи адам жаралган анан адамдар сулуулукту жараткан. Эгер сулуулук болбосо, дүйнөнүн бир жери кем болуп жетимсиреп калмак.

* * *

Адам баласы акылман да, акмак дагы боло алат, Эч бир адам «Акмак болом»– дебейт. Ага өзүнүн тагдыры жана тарбиясы туш кылып жатат.

* * *

Башыбызга кыйынчылык келгенде үстү-үстүнө кудайды эстеп калдык, Ага чейин эмне үчүн бир да жолу эске салган эмеспиз.

* * *

Жол жолоочуну жаратпай, жолоочу жолду жаратат, бирок адамдар мурунку ата-бабасы жараткан жолу менен да сапарлап ийгиликке жетет.

* * *

Суу болгон жерде гүл өсүп жатат. Суу гүлдү жаратса, гүл сулуулукту жаратат.

* * *

Терезеден жааган жаанды көрүп турам. Демек жашоонун өлбөстүгүн көрүп турам. Жаандын өмүрү өлбөстүктүн уланышы. Жаандын жааган шыбырты жашоонун өлбөстүгүнүн уланган шыбырты.

* * *

Бир тыйын дүйнөнү түзүп турат. Бай адамдар бир тыйынды чогултуп отуруп байлыкка жетем деп турат..

* * *

Жароокерлик баардык эле адамда боло бербейт. Ал мүнөздү күткөн адамдын жолу узак болот.

* * *

Чыныгы адам менен шайтандын жолу эки башка. Ал экөө элдешпейт.Элдешсе эле береги адам шайтанга айланат.

* * *

Караңгыда үйгө түшүп турган шоола бул жерде, дагы тиричилик бар деген белги болчу.

* * *

Адамдар көп бирок ошолордун ичинде сенин ишенимдүү досторуң өтө аз. Ошол үчүн сага жаккан адамдардын саны аз..

* * *

Башталган ишиң жакшылык менен башталса, анын аягы деле жакшылык менен бүтүп калышы ажеп эмес.

* * *

Чоң ийгиликке жетиш үчүн сен канча жол бастың, канча адам менен күрөштүң, бирок акыры ийгиликти жараттың, ошонун баары өлбөстүктүн берекеси болгон.

* * *

Ээн талаада жалгыз куштун сайраганы, быякта да жашоо бар, быякта да ыр бар деген такилип болчу.

* * *

Жашоо белгилүүлүктөн жана белгисиз нерседен турат. Белгилүүсү биз билген нерсе, белгисизи биз биле элек ачылбаган окуялар.

* * *

Жардамы жок көп туугандын болгонуна караганда, пайдасы тийген бир достун карааны артык.

* * *

Атанын жакшы уулу болгону үй-бүлөө үчүн кубаныч, үй-бүлөдөн да жалпы элге кубаныч.

* * *

Начар уул атасынын байлыгын чачып, жаштыктан да, байлыктан дагы алыстап баратат.

* * *

Адам-адамга, же коомуна жакшылык жасаган сайын жаңырып жашара берет.

***

Элинен куулган эл башчы өткөнүнү эстеп момурап отурат. Оорулуу адам айыгаар айыкпасын биле албай ойлуу момурап отурат. Акын ырын жазып бүтүп анын келечек тагдырын ойлоп момурап отурат. Кыскасы баары эле ойлуу момурап отурат.

* * *

Адамдарга жакшы насаат, кеңеш, тарбия берген адам өзүнчө эле бир мугалим сыяктуу сезилет.

* * *

Пенденин, аңкоолугу жана түшүнбөстүгү ал өзүнүн

тарбиясыздыгын далилдеп турат.

* * *

Акчаны тапкан адам жакырлыктан коргонот, ошол үчүн ал жан бүдөөгө түшүп эмгектенет.

* * *

Жазган чыгармаң да, иштеген ишиң да башкалардын ишине окшош болуп калышы ыктымал, кээде адамдар бир эле убакта бир эле ойду ойлонуп, окшош жумуштарды жасашат.

* * *

Улуу жазуучулар жазган чыгарманы мен деле жазчудай экем, бирок алар биринчи жолу мага калтырбай жазып салышыптыр.

* * *

Жакшы тарбия берген адамдын сөзүн оң, сол кулагың менен ук ал аз болуп баратса, жүрөгүң менен тыңшап, жан дүйнөңүн бекем жерине жоготпой киргизип ал!

* * *

Түбөлүк кедейлик эң жаман, кайратыңы жыйып ошол абалдан көтөрүлүп кетүүгө аракет кыл.

* * *

Жакшы китепти кайра окуп чыксаң, баягы эски досуңа жолуккандай болосуң.

* * *