Drakula

Otağların açarları üstündə olduğunu düşünüb ciblərini axtarmaq istəyirdim ki, ilan vurmuş kimi əlimi geri çəkdim. Qraf mənim burada olduğumu bilmirdi, amma donuq gözlərindəki dərin nifrətdən vahimələndim. Tələsik geri qayıdıb pəncərədən çıxdım və gəldiyim yolla otağıma döndüm.

29 iyun

Bu gün axırıncı məktubu “yazmaq” günümdür. Axşam yenə qrafın pəncərədən çıxıb divarboyu süründüyünü gördüm. Sözsüz, mənim məktubumu poçta salmağa getdi.

Oturub kitab oxuya-oxuya yuxuya getmişdim. Qrafın gəlişinə oyandım.

– Sabah, əziz dostum, yollarımız ayrılır. Siz öz İngiltərənizə qayıdacaqsınız, mən isə işlərimə. Sabah burada olmayacam. Faytonum sizi həyətdə gözləyəcək, Borqo keçidində başqa bir faytona oturub Bıstritsə gedəcəksiniz. Ümid edirəm ki, nə vaxtsa yenə görüşəcəyik.

Onun səmimiliyini yoxlamaq üçün birbaşa soruşdum:

– Niyə bu gecə gedə bilmərəm?

– Çünki atlarım və faytonçum burada deyil.

– Mən piyada da gedərəm.

– Bəs baqajınız?

Qrafın üzündəki şeytan təbəssümü şübhələrimi artırdı.

– Baqajımın dalınca sonra fayton göndərərəm.

– Siz ingilislərin yaxşı bir məsəli var: gələni xoş qarşıla, gedəni tələsdir. Mənim evimdə öz iradənizin əleyhinə bir saniyə belə qalmayacaqsınız! Gəlin!

Biz pilləkənlərlə aşağı endik. Birdən o dayandı.

– Qulaq asın!

Bayırda canavarlar ulaşırdı.

Qraf nəhəng giriş qapısına yaxınlaşdı, zəncirləri və sürgüləri açdı. Qapı aralananda canavarların səsi lap yaxından eşidildi. Yox, qrafın iradəsinin əksinə getmək mənasız idi. Axırda canavarlara yem olacaqdım.

– Bağlayın qapını, səhəri gözləyərəm.

Qraf qapını çırpdı.

Otağıma qayıdıb yatağa girməyə hazırlaşırdım ki, qapının arxasından qrafın səsini eşitdim:

– Gedin! Qayıdın yerinizə! Vaxtınız hələ çatmayıb. Səbirli olun! Bu gecə mənimdir, sabahkı gecə sizin.

Doğrudanmı, sonum çatıb? Sabah! Sabah! Tanrım, mənə də, əziz nişanlıma da kömək ol…

30 iyun

Səhəri dirigözlü açdım. Ölüm bu gecə gələcəksə, qoy məni hazır görsün.

Hava işıqlaşan kimi otaqdan çıxıb giriş qapısına tərəf qaçdım. Tələsik sürgüləri, zəncirləri açdım və böyük ümidlə qapını dartdım. Tərpənmədi. Dünən mən otağıma gedəndən sonra qraf qapını kilidləmişdi.

Mən bu açarları tapmalı idim!

Otağa qayıdıb pəncərədən çıxdım, yenə daşlardan tuta-tuta qrafın otağına çatdım və içəri girdim. Küncdəki qapıdan məzarlığa düşdüm. Qraf öz qutusunda uzanmışdı, ancaq yeşiyin qapağı bağlı idi. Qapağı qaldırıb divara söykədim və açarları axtarmaq üçün əyildim. Dəhşətə gəldim.

Qutudakı həmin qraf deyildi. O, çox cavan görünürdü. Dodaqları allanmışdı, saçı və bığları tünd-boz rəngə düşmüşdü. Ağzından boynuna tərəf qan axmışdı. Sanki bu bədheybətin qarnı xirtdəyinə qədər qanla doldurulmuşdu.

Xeyli axtardım, amma açarları tapmadım. Dayanıb gözümü qrafa dikdim. Üzündə alçaldıcı təbəssüm vardı. Mən bu vəhşiyə Londona köçməyə kömək edirdim? Kim bilir, orada insanların başına nə oyunlar açacaq!

Yox, dünyanı bu qəddardan xilas etməliydim! Onu öldürməliydim! Yerdəki beli əlimə aldım. Var gücümlə sifətinə zərbə endirmək üçün yuxarı qaldırdım. Qrafın başı döndü, qəzəbli baxışları mənə dikildi. Bel əlimdən sürüşüb onun alnında dərin yara açdı. Yeşiyin ağzını bağladım. Həyətdən at ayaqlarının tappıltısı, qaraçıların səsləri gəldi. Cəld qrafın otağına qalxdım, diqqətlə səslərə qulaq asmağa başladım. Aşağıda açar cingildədi, qapı açıldı. Deyəsən, yeşikləri bayıra daşıyırdılar. Bir azdan qapı örtüldü.

Belə çıxır ki, zirzəmidəki məzarlıqdan bayıra çıxış var? Sakitlik çökəndə təzədən ora düşmək istədim. Bu dəm güclü külək küncdəki qapını zərblə çırpdı, nə qədər itələdimsə, açılmadı.

Vaxt daralırdı. Həyətdən gələn çəkic taqqıltısı, at kişnərtisi, araba təkərlərinin cırıltısı da kəsildi. Artıq bu böyük qəsrdə mən tək qalmışdım. Mən və bir də o üç qadın…

Yox, onlarla təklikdə qalmayacağam. Qəsrin divarları ilə qrafın otağına endiyim kimi, buradan da aşağı düşməyə çalışmalıyam. Özümlə bir az qızıl da götürməliyəm – gərəyim olar. Sonra isə – düz evə! Ən yaxın qatar stansiyasına! Buradan mümkün qədər uzağa!

Bu qaniçənlərin əlində qalmaqdansa, Tanrının mərhəmətinə ümid etmək yaxşıdır. Uçurum dərindir, amma başqa yolum yoxdur. Əlvida, Mina!..

V hissə

Mina Mürreydən Lüsi Vestenraya məktub

9 may

Əziz Lüsi!

Uzun zaman yazmadığıma görə üzr istəyirəm. Məktəbdə dərs hissə müdiri olmaq asan iş deyil, yoruluram. Stenoqrafiya ilə də məşğul oluram ki, gələcəkdə Conatana kömək edə bilim. O öz gündəliyini stenoqrafiya ilə yazır. Conatandan məktub gəlib. Sağ-salamatdır, haradasa bir həftəyə qayıdacaq. Səndə təzə nə var? Ucaboy, qıvrımsaç yaraşıqlı bir kişi haqqında şayiələr dəyib qulağıma.

Səni sevən Mina.

Lüsi Vestenradan Mina Mürreyə məktub

Çərşənbə

Əziz Mina!

Təzə maraqlı heç nə yoxdur. Dediyin o yaraşıqlı kişi – mister Artur Holmvuddur, tez-tez bizə gəlir, anamla söhbətləşir. Bu yaxınlarda Holmvud bizi bir cənabla tanış etdi, 29 yaşı var, amma artıq professordur, ağıllı və qətiyyətlidir, ruhi xəstələr üçün böyük tibb müəssisəsinin rəhbəridir. Conatana nişanlı olmasaydın, deyərdim ki, əsl sənlikdir. Mənsə, Mina, Arturu sevirəm. Uşaqlıq dostum kimi sirrimi yalnız sənə açıram.

Lüsi Vestenradan Mina Mürreyə məktub

24 may

Əziz Mina!

20 yaşıma az qalıb, hələ mənə evlənmək təklif edən olmamışdı. Bu günsə birdən-birə üç təklif aldım!

Birincisi ruhi xəstəxananın baş həkimi doktor Syuvard idi. Təklifini qəbul etmədim. İncimədi, dedi ki, nə vaxt dost köməyinə ehtiyac duysam, qulluğumda hazırdır. İkincisi günortadan sonra gəldi. Texaslı bu gənc – mister Kuinsi Morris – çox tərbiyəli, savadlı adamdır, dünyanın yarısını gəzib. Hislərini elə gözəl ifadə edirdi ki, ona rədd cavabı verəndə ağladım. Amma başqasını sevdiyimi gizlətmədim. Mister Kuinsi də mənə əbədi dostluq vəd etdi.

Üçüncüsü isə Artur idi. Hər şey bir anda baş verdi. Mina, Mənim xəyallarım gerçəkləşir!

Doktor Syuvardın gündəliyindən

25 aprel

Dünənki uğursuzluqdan sonra iştaham da küsüb. Başımı işlə qatıram. Xəstələrdən biri – Renfild məni çox maraqlandırır. Adi dəliyə oxşamır. Renfildin 59 yaşı var, çılğın təbiətlidir, fiziki cəhətdən güclüdür. Məncə, axırda o, bir problem yaradacaq. Təhlükəli adama oxşayır.

Kuinsi Morrisdən Artur Holmvuda məktub

25 may

Sabah axşam sizi evimə dəvət edirəm. Con Syuvard da gələcək. Sizin – dünyanın ən gözəl qadınının qəlbini ovlamış xoşbəxt dostumuzun sağlığına içəcəyik. Gözləyəcəyik.

Artur Holmvuddan Kuinsi Morrisə teleqram

26 may

Gələcəyəm və sizə elə xəbər gətirəyəcəm ki, ağzınız açıq qalacaq.

VI hissə

Mina Mürreyin gündəliyindən

24 iyul, Uaytbi

Lüsi məni vağzalda qarşıladı. Kresşentdəki böyük bağ evlərinə getdik. Uaytbi abbatlığının qalıqları ilə şəhərin arasında kilsə ucalır. Kilsənin yanında hasarla əhatə olunmuş qəbiristanlıq var, hasarboyu skamyalar düzülüb. Buradan körfəzə və limana gözəl mənzərə açılır. Mən həmin skamyalardan birində oturmuşam. Üzü, əlləri qırışıq bir qoca ilə – adı Svezldir – söhbət edirəm. Sonra o, evə gedir, mən də qalxıram.

Artıq bir aydır ki, Conatandan xəbər yoxdur.

Doktor Syuvardın gündəliyindən

5 iyun

Renfild mənimçün getdikcə daha maraqlı olur. Mənə elə gəlir ki, onun nə isə bir planı var, amma nə plandır, baş aça bilmirəm. Meylini heyvanlara salıb. Milçək tutub saxlayır. Danladım, dedi üç gün vaxt verin, yığışdıraram.

18 iyun

Renfild indi də hörümçək saxlayır. Milçəklərini onlara yedizdirir.

1 iyul

Renfildə dedim, hörümçəklərinin sayını azaltsın. Yanımda yağlı bir milçəyi tutub ağzına atdı. Görəsən, hörümçəklərinin də sayını bu yolla azaldacaq?

19 iyul

Renfild sərçələrə keçib. Bir sürü sərçəsi var, hörümçək və milçəklərlə kökəldir. Bu gün mənə yaltaqlanırdı, pişik istədi. Şübhələndim, dedim, buralarda çətin tapılsın. Gözlərində qəzəb parıldadı. Bu adam əsl manyakdır.

20 iyul

Renfilddən sərçələrinin hara yoxa çıxdığını soruşdum. Dedi, buraxmışam. Günorta qulluqçu gəlib xəbər verdi ki, Renfild qusur: “Qarnından çoxlu sərçə tükü çıxır, mənə elə gəlir ki, o, quşları diri-diri udub”.

Mənim fərziyyəm təsdiqini tapır. Renfild – xüsusi növ manyakdır, ibtidaidən aliyə doğru getməklə mümkün qədər çox həyat məhv etməyə çalışır. Milçəkləri hörümçəyə, hörümçəkləri sərçəyə yedizdirdi, sərçələri isə pişiyə verməyə hazırlaşırdı. Növbəti mərhələ, görəsən, nə olacaqdı? Bəlkə, eksperimenti davam etdirməyə dəyər?..

Mina Mürreyin gündəliyindən

26 iyul

Lüsidən və Conatandan narahatam. Conatandan məktub gəlmir. Lüsinin isə köhnə xəstəliyi baş qaldırıb. Gecələr yataqdan qalxıb gəzir. Anası ilə danışdım, razılaşdıq ki, qapısını bağlı saxlayaq.

3 avqust

Conatandan hələ də məktub yoxdur. Son məktubunu bir də oxudum. Onun xəttidir, amma heç özünün sözlərinə bənzəmir. Lüsi bu həftə nisbətən rahat yatıb. Hərçənd bəzən gecələr durur, qapının bağlı olduğunu başa düşəndə açar axtarır.

6 avqust

Conatandan xəbər çıxsaydı, bir az rahatlanardım. Dünəndən hava bozarıb, balıqçılar deyir, fırtına gözlənilir. Sahil gözətçisi gəlib skamyada yanımda əyləşir.

– Dənizdəki o qəribə gəmini görürsünüz? Rus gəmisinə oxşayır. Dalğalar onu oyan-buyana atır, gəmi isə hara gedəcəyini bilmir. Sahilə də yan almır, sanki idarə olunmur.

VII hissə

“Deyliqraf” qəzetinin 8 avqust sayında dərc olunmuş məqalədən parça (Mina Mürreyin gündəliyinə əlavə edilib)

“Fırtına birdən başladı. Külək ulayır, ildırım çaxır, dalğalar şahə qalxırdı. Mayakın projektoru işə düşəndə bir neçə gündür dənizdə vurnuxan gəmi yenə göründü. O, sürətlə sahilə doğru gəlirdi. Nəhayət, gəminin burnu quma girib dayandı. Gəmidən yekə bir it tullanıb qəbiristanlığa doğru qaçdı. Sahil gözətçisi göyərtəyə birinci qalxdı. Sizin müxbir də onun ardınca getdi.

Göyərtədə sükana pərçimlənmiş bir ölüdən başqa heç kim yox idi. Ölünün əlində xaç vardı, biləklərinə kəndir dolanmış, sonra sükana bağlanmışdı. Sahil gözətçisi baxan kimi dedi ki, bu adam özü-özünü bağlayıb, əsl kapitan kimi sonadək vəzifəsini icra edib. Ölünün cibindən bir dəftər çıxdı”.

Qəzetin 9 avqust sayında məqalənin davamı

“Bu, Varnadan Uaytbiyə gələn rus gəmisi imiş. Yükü qumdan və taxta yeşiklərdə qara torpaqdan ibarətdir. Mənə gəmi jurnalı ilə tanış olmaq imkanı verdilər. Amma orada adamların yoxa çıxması haqqında qəribə qeydlərdən başqa maraqlı heç nə tapmadım. Kapitanın cibindən çıxan dəftər daha maraqlı idi. Özünüz əmin ola bilərsiniz:

Конец ознакомительного фрагмента.

Текст предоставлен ООО «ЛитРес».

Прочитайте эту книгу целиком, купив полную легальную версию на ЛитРес.

Безопасно оплатить книгу можно банковской картой Visa, MasterCard, Maestro, со счета мобильного телефона, с платежного терминала, в салоне МТС или Связной, через PayPal, WebMoney, Яндекс.Деньги, QIWI Кошелек, бонусными картами или другим удобным Вам способом.

1

Herr – almanlarda imtiyazlı cəmiyyətə mənsub şəxslərə nəzakətlə müraciət forması (həm də soyad və ya vəzifənin əvvəlində işlənir); cənab