Арсеман, монь арсеман…

Ёвтния педе-пес, кода ульнесь.

– Пекеть вачсь? Ярсамо кармат? Оно мезе, – кепедизе, «оно»-ть лангс лепштязь, вайгелензэ, юхадсь вить кедьсэнзэ мештензэ икелльга Груня, – гайневтсь Терентий Тимофеевич. Кевкстнесь, мекс эзинек сакшно тенст, кода кортазель, инжекс. Ёвтыя тувталонть. Истямо мель ёвтась: садо, зярдо савтадо. Максызе телефононь номерэнзэ. Оно, вальмалангсо конёвпанкскесэнть. Мусак. Икелест, видькстан, чумо теинь – эзинь гайневте асамодонок, – паро кулянь ёвтыцясь сурсонзо нардынзе турванзо, стакасто, виень путозь витемтизе рунгонзо ды ютась удалце кудов.

– Паро, колмо-ниле чинь ютазь варштатано, – меринь дивансто стямсто ды эскельдинь Груня мельга. Мария, пекем каравсь, ледстни пештемадо. Озынь свалшкань озамо тарказон стувор экшс. Учан.

«Эрь эно, стяко пелинь, стяко мелявтынь, – арсезевинь, – лиссь кортазенть коряс, читне ансяк аламнеде шаштовсть. Мезе теде полавтовсь? Сюк пазонтень, Везувий одс эзь вельме, Равгак пелеве ёнов чудеме а арси. Колмо-ниле чинь ютазь ультяно Черькаень кедьсэ. Содамс, кода оршазь вастсамизь Наталь? Пароль, кода сестэ, васенцеде вастовомстонок, – нурька пильге, чопода-сэнь човине коцтонь понкст, сэняжа тюс, теке менелесь, ожавтомо ковтыне. Те уш кода пазось мери. Иненть а кармавтсак».

Вана сон кодамо, Наталь!

Пичепев од содавиксэнек туртов молемадонок икеле лиссь вана кодамо тев.

Шумбрачинь кудосто самодон мейле омбоце чистэ, чикуншкань ютазь, совась тенек апак учонь, киде зярдояк арсезьгак арасель, инже – Вельдяень Ирина, Пичелень библиотекаресь, свал ков-бути капшиця, верка, теке штере авась. Паряк, секс истямо коськанаяк? Оршамотне лыйнить лангсонзо.

– Шумбратадо, Паксютт! – ансяк кенерсь совамо, киякссто потолокс пештизе кудопотмонть жойниця ванькс вайгельсэнзэ. – Кода эрятадо-аштетядо? Тевенк молить, мезе лангскак а пеняцятадо?

Аванть аволь книгань-библиотекань кевкстнемадонзо васня талакадынек. Те кода истя, кевкстни – теке Сюватонь Галя медичкась. Меремс мезеяк эзинек мере. «Пеняцямодо» чаво валонзо ютавтынек пиле вакска.

Иринанень ведьгеменьшка. Минек коряс од ломань. Сыретнень юткс а совавтсак. Седеяк – лангс ванозь. Кодамокс иляк лово, эрязачинзэ лангс ванозь сявадыть ламонь сельмть. Моли – мельганзо чиезь а кенерят. Секс сонензэ пароль улемс аволь книгань азоравакс, а сёрмань-кулялопань кандтницякс. «Кунсолока, атя, паряк, неень библиотекартненень улемаяк Иринань кондямокс?! Чийнемс, а мезть нувсемс книгатнень марто чаво нупальсэнть».

– Ютак икелев. Озак, прякан варчить, – сэрей-сорныця вайгельсэнзэ тердизе Груня совицянть. Оно, невтсь панжадо коморсонзо стуворонть, вакссонзо чаво эземненть ёнов.

– Арась, арась, Груня патяй! Сюкпря, шкам арась, – эрязкалезь, прясонзо сеедьстэ чертязь, мештензэ икеле сеедьстэ ахолязь, ёвтызе мелензэ Ирина, кудокуншкасо стядо аштезь. – Мон вана «Валдо» журналонь од номер тенк кандынь. Кеман, Алё лелянь кецявтса! Сон велесэнек весемеде виев книгань «порицясь». Номерсэнть ёвтневи минек велень авадо – Черькаень Натальде. Тынь, Груня патяй ды Алё леляй, аволь минек велень, содасынк сонзэ, а маняван, чульть-чальть. Секс ловносынк сёрмадовксонть паро мельсэ.

Мон аватнень юткс, мезде-кода кортазевсть, эзинь эцне, чатьмонезь аштинь стувор экшсэ ды састыне «варчнинь» Грунянь модамарень истямо кавшаня ды чевте-тантей панжакаензэ. Сускат – келеть нильсак.

Иринань кургсто марязь кавто валтнэде, кецнемадонть эль эзинь кирнявто потолокс, кивчкадсь, ютась пачкан мезе-бути ёндолонь кондямо. Мон стинь, автордыя аванть кедьстэ журналонть ды озынь «ловнома тарказон», мелень ванозь, монськак а содан мезде пелезь, панжия ансяк кандозь «Валдонть». Вельксэзэ-лангозо теезь мазыйстэ, кода кортыть, танстень марязь, – ваны лангозот сэняжа-ашо тюсонь фотокувостонть эрзякс оршазь мазый – сельметь а саевить – ава. Нолдык чумом, «Валдо», талай эзитинь сайне кедезэнь.

Варштынь ёнкскентень, кинь сёрмадовксост номерсэнть. Кузьмин Григорий, Тимофеев Алексей, Пахомов Яков, Василий Ёндол, Радай Васильев… Содавикст, содавикст! Те сынь 30-це иетнестэ ульнесть юронь путыцякс эрзянь литературантень, сынь теекшнизь ашождыне васень эскелькстнэнь. Кода эно, вечкевикс сёрмадеень! Кода а содамс ды а вечкемс масторонть келес содавикс «Кенгелькай» романонть авторонзо Колмомасовонь? Сисемеце классо тонавтнемстэ эрьвантень, кие мезеяк а истя ёвтыль, раксезь-згилязь мерилинек «кенгелькай». О-ох, кода те умок ульнесь, кода васов кадовсть сеть шкатне!

Пачкодинь, лемтнень ды сёрмадовкстнэнь ваннозь, Сыреськина Раиса видьс. Те сон кодызе-сёрмадызе «Авань мазычи» фотокуво марто покш статьянть. Сонзэ кедьчелькесь! Панжия невтевикс ёнкскенть ды сельмень эртевсть… Наталень ёнкскенть келесэ покш фотопортретс!

Ловныя Раянь шкинемань видевксэнзэ весть лекстязь, ютынь омбоцеде. Берянь мезеяк а мерят, парсте, сюпав кельсэ викшнизе Раюш статьянзо. Ве таркасонть – покш абзац – ёвтневи откерьаванть рунгонь-чамань мазычидензэ: «…рунгозо – а эрьва тейтернень сави шнамс пря – тундонь од килей, вановтозо – пицезь пицесы седееть, чамасонзо мизолксось сияждозь сияжды…».

Видестэ, петнявкскень пес видестэ невтизе. Ансяк теде, видькстан, ловномс монень а мезть. Неия, латынень кельсэ мерезь, в натуре, аволь кодамояк алкинепитнень артовкссто. Аволь ансяк неия, вана нейгак гайгезь гайги пилесэнь сырнень вайгелезэ.

Таркань ютазь сёрмадыцясь ёвтни Наталень ошсо ды велесэ кудоютконь, кардазонь ды пирень ламодояк ламо мелявкстонзо. Уски сынст, кода сёрмады Рая-Раиса, – лишмекс. Те уш, монень маряви, вельть казямосто – лишмекс. Эряволь седе чевтинестэ. Теке марто журналось теньсэ невтизе аволь ансяк Наталень мазычинзэ, невтизе тевень вечкиця-теиця ломанекс. Сонзэ кунсолыть цёрань тевтнеяк, кунсолыть узересь, инксэсь, пилась, мушкорось… Тевтеме, диван лангсо лужалемань эрямось – аволь сонзэ, те аволь эрямо.

Эзия редя, зярдо выр-выр тусь Ирина, мельганзо састыне панжизе кенкшенть, лиссь эмежпирев Груня, мон яла а явован Иринань истямо тень питней казнензэ марто.

Пекстыя журналонть. Кедьсэнь сонзэ кирдезь, сельмень конязь, зярс-бути аштинь озадо таркасон. Арсинь. Арсинь ловнозденть, статьянть кельдензэ, Натальде… Ней сатано тенст аволь кода веёндонь ломанть, а кода талай шкань содыцяст. Тенень лездасть «Валдо» журналось ды Вельдяень Ирина.

Арсезесь топавтовсь

Сынек шкастонзо, кода кортазель Терентий Тимофеевич марто. Чокшнень сисем чассо лоткавтыя «автом» кавтов панжтневиця, тень аламнеде содавикс, кшнинь келей кенкшенть икелев.

– Вана тесэ, пиже пацясо копачазь неть пичетнень ало, эрить-нежедить Теряй атя ды низэ Наталь, – меринь мекс-бути салава талнозь Грунянень, ансяк лисинек урныгайстонть. – Тесэ сынь, прок письмарт, ютавтнить лембе шкатнень. Те таргавкшны чадыковсто ожоковс. Тунда сыть, пизэ пурныть, экшенди – стить, кода нармунть, сёлмо лангс ды саить ки лембе ёнов, ошов.

Панжия потмо ёндо тулодозь сэнь кенкшенть, ды совинек азортнэнь «масторс». Сыргинек пиренть кувалт видьстэ таргавозь, лугасо вельтязь янганть кудынест ёнов. Пирест пелеве ёно, песэнзэ, – ветешка-котошка иесэ пичинеть. Удалост, сеске пиренть тона ёно, прок тетяст-аваст, – свал пиже, пондакш пря сыредеяк сыре пичеть. Сынь ванстыть пелевеёнксонь кежей варматнеде аволь ансяк эйдест, од пичинетнень, ванстыть пиренть куншкасо оно се чувтонь кудынесэнть эрицятненьгак, Черькайтнень.

Яннэнть, кува Груня марто эскелятано мельцек-мельцек, кавто ёндо пирить васня инзеень тусто куракшт, мельгаст – шукшторовт, торлат. Сынст удалга, керш ёнга, – аволь сыре умарьчувтт. Сынст мазылгавтыть ожола, пиже, якстере умарть. Те тешкс азортнэнь, васняяк, кеман, Наталень, мелявксчидест. Ве аэрявикс, зыян тикшине а неят – косо ледезь, косо мелень путозь чупонезь-изазь.

– Неят?.. – састо эскелязь, тей-тов ваннозь, марямга, прок экскурссиянь ветниця, пшкадинь Грунянень, ахолдынь керш кедьсэнь умарьчувттнэнь пелев.

Умарьков. Ушосонть општ. Маней. Менелень сэньштесь, маряви, салавине, эль марямга гайги. А неят пельпакшке. А рестыця пси, а экше, кодамо эрси те шкастонть. А сеськеть, а карвот. Певтеме мазычи ды медьарвонь чине кошт. Лексят лексевлить! «Мекс, мекс тенек свал мезеяк ды а саты, мекс свал маряви тесь-тонась аламо, мекс а содатано пештявома? Валдочама чить, сэрей вирть, келей паксят, сэнь сельме лейть-эрькеть, морят-океант, пандот… Весе сынь минек… Эряк, кецнек, морак! Мезе тенек невак эряви? Топодтяно-арась зярдояк?» – арсезевинь, седеем колавсь тувталтомо.

– Неян, – нурька чатьмонемадо мейле прась Грунянь кургсто, теке пупордясь, валось. Мелезэ кортамс арасель – ваннось, мезе касы-кастови перьканзо, велявтнесь прянзо тей-тов.

Терентий Тимофеевич ды низэ Наталь аштесть озадо кузтемпень лато ало. Неявсь, учость. Редимизь, стясть, лангозонок ванозь ды эсь ютковаст мезде-бути кортазь.

– Шумбрачи, шумбрачи! – каятотсь човор, азортнэнь ды минек пельде.

Теряй лелям венстизе вить кедензэ монень, паро мельсэ лепштинек кедьлапанок, сэнь сельмесэнзэ цитнесть кеняркс ёжонь сяткинеть. Нолдызе кедем ды парсте марямга, прок ушман, яволявтсь:

– Мон тынк кедьсэ ульнинь. Секскак содавтневемс а мезть, Теряй атянь содасынк. Тыненк Груня марто мон саван лелякс, секс тынсь чарькодьсынк, кода тень пшкалемс. Покштянь-сырькаень койтнень эрявить ванстомс, – паро ёжосо, мизолдозь, макссь тенек, одтнэнень сонзэ коряс, превть

– А мон – Черькаень Наталь, тетялемем – Викторовна. Саван кавоненк туртов, кода маринь, кирдажокс, – пеедькшнезь содавтызе эсь прянзо азоравась, теке мель путсь невтемс ашо, цитниця вейкеть пеензэ. – Паро, теевинек, окойники, седе малавиксэкс. Мон те велень, ансяк пенсияс туемазон сакшнынь аволь сеедьстэ, сакшнынь авань варштамо. Шкань ютазь … Ну, те уш лия моро.

– Монень чачома чистэнь саезь мерить Груня. Минь Теряй лелянь марто ве велень, аволь Пичелень. Мелявксонок, кода велень эрицятнень весень: ботатано чоподасто чоподас, пе а содатано, кудосо-кардазсо, лембе шкатнестэ – пиресэ. Лисни, минь Алё марто – алкуксонь велень эрицят, – чамдызе потмонзо ним, кузтемпесэ Наталень каршо аштезь.

Колмо-ниле валт ёвтынь эседень, Алё-Алексейде. А вечкеви, зярдо тень истя пшкадить. Мекс – а содан.

– Мезе, адядо кудос, – апак учо каятотсь, шаштынзе веёнов содавтомадо кортамотнень, Теряй лелянь чевте, вечкевикс вайгелезэ. Корты сэтьместэ, кунсолыцянзо марязь. Бути кодамояк пелькстамо, ушоды кортамо, мезенть редия невак икеле вастовомстонок, псистэ ды кемевтезь, а поты, мерезенть а полавтсы.

– Ужо, атя, иля капшавто, – сорновтызе раужосто артозь прячерензэ, сертизе поланзо азоравась, – адядо васня, инжеть, невтьса тенк, пря шнан, «эмежуманок».

Теряй лелям мезеяк эзь мере. Озась удалонзо эземнентень. Моньгак арасель мелем, каня эсенек пурькатне-якстерькатне лият? Седе ён, седе мель витевель кадовомс теске. Арась, тень ловия мелень аваномакс. Секс апак капша, перькан ваннозь, увол-авол сыргинь Груня ды Наталь мельга.

Валтнэнь ёвтазь, Наталь саимизь – сонсь икелев, теке экскурсиянь паро ветиця, – кудонть тона ёнов, икелев, косо кастовсть эмежензэ – эмежпирев. Састо, киртязь эскелькссэ эскелясь пандятнень юткова, сонсь, кедьсэнзэ тей-тов невтнезь, лодорсо, паро кайкссэ-мельсэ ёвтнесь пирень путовкстонзо.

Ёвтнесь, кодат парт тедеде ульнесть чурьканзо, лепиякшнозь ёвтнесь ожолгадыця помидордонзо, пурькадонзо, таргазь модамардензэ. Лия ёвтнема ютавтсь куяртнэде.

Эмежтнеде «экскурсиясь» прядовсь. Ветицязо саимизь «эрькензэ» ваномо. Те – кеменьшка-кеветеешка метрань келесэ-кувалмосо, метрань сэрьсэ ведте пешксе чувовкс.

– Ведезэ, нетядо, чемень тюжа. Маштови ансяк валномс. Теяк паро. Ялатеке эйсэнзэ калтнэнень эрямс маштови. Эрить. – Тень эйсэ ванноманок прядовсь. – А ней, оят-ялгат, – ахолдась «эмежумань» прявтось кедьсэнзэ, – адядо варштадо эрямо пизэзэнек…

Якинь аватнень марто пандяюткотнева ды превстэнь эзь лисне мелесь: мекс минек эмежень, умарень кастомань профессиясь васенце таркасо ды весемеде вечкевикс? Ламотнень-ламотнень туртов модасо котьмамось – васень тев. Артист – превсэнть эмежть, инжеер – эмежть, седеень хирург – эмежть, тонавтыця – эмежть… Мик балеринаяк – эмежть! Логигань коряс эряволь тенек копачамс планетанть модамарьсэ, помидорсо, куярсо, чурькасо, капстасо… Тень таркас усктано сынст Египетстэ, Израильстэ, Мексикасто, Белорусиясто, Грециясто ….

Те кода истя? Месэ тувталось? Вейкеньсэ: вельть ламот – «агрономт». Кастыть эмежть сеть, кить «эмеж» валонтькак а содасызь. А содыть, кона ёндо модас озавтомс чурьканть. Эрьвась эсензэ тевензэ кода эряви топавтозо! Балеринаськак… Фараонтнэнь пингстэ саезь ульнесть сюронь кастыцят, кевень таргицят, кевень лаксицят, кепсицят, путницят…Истя вана! Истя апак явно, зярдояк Эфиопсонь пирамидась, Модамасторонь дюниясь, путозь зярдояк аволь уле.

Теряй атя нучказь аштесь таркасонзо. Арсесь. Оймсесь. Учось самонок.

Кайсинек кузтемпенть икелев карсеманок ды азораванть мельга мельцек-мельцек сэдявкскенть ланга, колмо-ниле чалгавкстнэнь изнязь, кузинек-совинек кудыкелев.

– Вана тесэ, – чольдердсь, сизема эзь сода, Наталень вайгелезэ, ахолдась кедьсэнзэ керш ёнов, – кода поладкс кудонтень – баня. А вана эрямо пизэнекак, – панжизе ожола-тюжа покш-сэрей кудокенкшенть.

Совинек кудос.

«Алкукскак «пизэ», – арсезевинь, зярдо эскельдинь лиятнень марто кенкшалксонть трокс «зепешка» нупальс. Кельгсть эйзэнзэ: керш ёно – диван ды мельганзо стуворнэ, вить ёно – голландка ды кезэрень пингень апак лотксе урныця кельмонькай. – Велявтомс а косо. Кода эрить?» Икельце кудоськак теке – пештешка. «Кода эрить?» – эзь лисне превстэнь.

Икельце кудонь каршо стенасонть Наталень раужо-ашо покш портретэнзэ. Вейке фотокувосонть сон балеринань оршамосо, теи балетэнь па. Фототнеде башка, мезть ансяк арасть понгавтнезь стенаванть: театрань ташто афишат, грамотат, газетасто керсевкст… Пианинанть лангсо част, книгат, покш ваза, конёвонь кувта, бальцянонь кечине, ашо илевстэ мазыйстэ кодазь кептерь…

– А ней, инжеть, – стувор экшс! – кармавтыця жой вайгельсэ мерсь Наталь, ансяк прядызе ёвтнеманзо кудочидензэ.

Ютынек удалце кудос. Мерсь озамс таркаваст аравтнезь эземнетнес. Калдор-калдор ойсинек.

Груня – стуворнэнть тона пес, келей вальманть икелев. Сонзэ каршо – мон. Теряй атя – монь ваксс. Наталь эзь оза. Сон азорава. Удалонзо плитанть лангсто саизе рестазь модамарь пачалгонть ды путызе стуворонть куншкас. Кельмонькайстэ таргась салатто пешксе вакан.

Те «вакандонть» кой-мезе лия ёвтама. Эйсэнзэ ве таркас керсезь кенерезь помидорт, куярт ды чурькат, аламнеде почодовить салсо, каяви майонез эли чиньжарамой. Парсте човорямодо мейле ярсамось анок. Груня лездась керсемс кши, печтькетнень вачкинзе вакашкес, таркаваст путнинзе пенчтнень. Кодамо ава а муи эстензэ стуворэкшень тев? Салатось – монь вечкевикс ярсамопелем. Маряви, сондензэ тантей мезеяк арась. Порян… Теке теде содась Наталь!

– Эряволь куш пенчкень-пенчкень, – Теряй атя кепедизе прянзо стуворонть велькссэ лавсиненть ёнов, тов, косо кирдевить зярыя сортонь чаракавтыця ведтне.

– Минь тонь марто, атя, коське кургот, Алёяк Груня марто, содан, истятнэде. Сестэ кинень нуртямс? Стуворонокак аволь неень шкань, пепсить-мепсить эйсэнзэ арасть. Весе эсенек. Экологически, кода ней кортыть, ванькст, – ливтнесь стуворонть велькска Наталень гайгиця вайгелезэ, «пенчкень-пенчкень» мелесь яволявтозель аэрявиксэкс ды шаштозель веёнов.

Истя тантейстэ, мик мазыйстэ, рестазь модамарде, монень марявсь, зярдояк эзинь ярсне. Теке Груня истят зярдояк эзь рестне. Пачалгось, ванан, чамсь куроксто. Лисни, тусть аволь ансяк монь мельс.

Ярсамонь кирдась прядовсь. Наталь урядынзе стувор лангсто кедьгетнень ды ушодокшнось кофень кайсеме. Ушодксонть колыя мон.

– Ужо, иля капша, – кепедия кедем ды кардыя сонзэ, мезеньгак лиянь апак ёвта, меринь аламос учомс. Чатьмонезь стинь таркастон ды эрязкалезь лисинь ушов, ношкстынь «Нивам» ёнов.

Курок велявтынь. Эль-эль панжия кенкшенть ды совинь кудос. Мештезэнь лепштязь, кавто кедьсэ кирдинь покш арбуз. Путыя, сеедьстэ лексезь, стака канстом вальманть каршо келей эзементень. Тестэ сеске путыксэлия стувор лангс. Эзь лисе. Савсь путомс мекев ды озамс тарказон.

– Ужо, ужо… – кардымим азоравась. Сонсь куроксто совавтсь кудыкельде покш вакан ды путызе стувор лангс, таргась покш пеель. – Ней тев тонеть, Алё!

«Ну и штере, – арсезевинь Натальде, – эрьва ков кенери! Палозь палыть тевтне кедьсэнзэ».

Стинь таркастон, путыя пиже покш оскам совавтозь ваканонтень, прок пизэс, саия анокстазь пееленть ды керсия ламбамо потьмеж умаренть палонь-пал. Ярсынек ды апак эрязкале кортнинек эсенек юткова теде-тонадо. Шкань-шкань та-кода салава кепсия вановтом мельганок яксиця Наталь лангс. Лангсонзоль, мезесь вельмевтсь мештесэнь кецневтиця ёжот, се сэняжа нурька ожа, ансяк лавтовонь копачиця, ковтась.

Апак учо сыргозсь потсон стихень ловномань толгам. Витемтия рунгом, кепедия вить кедем мештем икелев ды талнозь, каршон вальманть лангс ванозь, пшкадинь Есенинэнь валсо:

А янксян, а тердян, а авардян,

Пингем тусь, прок валскень стямсто сув.

Сёксень поекс пизем ало тардян —

Мештесэм ней аволь тундонь увт.

Тон ней састо веренть сангам пансят

Кельмсэ чавозь, пужозь седеем.

Ды а тердить эйсэм лаймот-паксят

Кепе чийнемс ней арась мелем… —

прядынь меельце валтнэнь ды мария, кодамо стака канст талномадонть каинь лавтовон лангсто. Чамам палсь. Кедем эль неямга сорность. Теке марто, совасть эйзэнь вечкевикс ёжот. Прядовсь ловномам талаень каштсо ды сеске цяпамосо. Теряй атя эсь мелензэ нурькинестэ ёвтнизе Есениндэ, сонзэ шкинеадонзо.

Эзень арсе, превскак эзь совсе, эзимем содавтнея мелесь: Наталь апак учо, вана ней, кази тень истямо седейс педтця, астувтовиця казне.

– Мельвановикс инжеть, Алё ды Груня, ледстнемакс течинь чиденть мелем поладомс Есенинэнь. Алё ёвтнесь поэттэнть стихсэ, Теряй лелям пачтясь тенек шкинемадонзо, мон, прынь мельс, поладомс моросо

Вальмам вельссэ ковось.Вальмам ало варма.

Сиянь тюс тополесь штапьскадомо кармась.

Гармониясь ризнэзь васоло аварди,

Нусманя вайгелесь веленть песэ тарди…

Кунсолынь, мерян видьстэ, апак згиля, кургонь автезь. Истямо ванькс, сэрей, истямо чольдеркай вайгель марсемс тень эзь савкшно, прянь апак шна, радиостояк. Прядызе Наталь морамонзо, озась, талномадонть, марявсь, кундатось келезэ, зярс-бути чатьмонезевсь. Нусманя моронть лувозо, менельга ливтниця вайгелесь яла гайгсь пряудемсэнь.

Кода сеедьстэ эрси, аватнень кортамонь темаст аволь чуросто эрси вейке: эмежть, умарть, пиреть, оршамот, ярсамопельть, питнеть.., цёратнень – лия.

Лисинек Теряй лелянь марто кузтемпес. Озынек тесэ свал кирдевиця эзементень. Чись эскелясь прядовома ёнов. Перьканок васолга-кува чатьмонезь чарасть сундерькст. Опаня. Каршонок маралякс аштиця пичетне аштить, сорк а теить, теке учить мезе-бути покш, мелень топавтыця. Кортамонок мольсь васняяк масторонок, покш масторонок каладомадо, СССР-нь ёмамодо. Покш мель явинек, мекс чикор-лакор молить ве кудосо, ве семиясо эрямонь тевтне, мекс явицятнеде полыицятнень коряс седе ламо, мекс ламо урозэйкакшт… Талновтсь Теряй лелянь, кода моньгак, эрзянь келенть резэма ормазо. «Кие чумось? Мезе теемс?» – кевкстематне сизесть каршо валонь учомадонть.

Теде-тонадо кортамонок мольсь, зярс чипаесь эзь кекше чополгадыця виренть тона ёнов ды эзь эскельдя седе малав сэтьме чокшнесь.

Уле ушодкс ды уле-уле пе

Кизэнь се маней лембе чокшнесь умок теевсь астувтовиця ледстекмакс се вастовомадонть. Ютасть кеменьшка, паряк, седеяк ламо иеть. Ламо ведь чудсь лейтнева. Ламо эрьва кодамо тюсонь ды парцунонь пельть сиземань апак сода уйсть Пичеле велькска. Ансяк сынсь содасть, мезде арсесть ды кодамо тевень тееме капшасть.

«Мезе полавтовсь эрямосонок Черькайтнень кедьсэ улемадонок, се опаня чокшненть ютазь?» – шкань-шкань совси прязон кевкстемась, совси монь апак кевкстне. Мезть кевкстнемс? Мезе ульнесь – ульнесь. А ёртсак.

Полавтовсь ламо мезе. Васняяк, содави, кемень-кеветее иес сырединек. Теде а кекшат. Эрямонок Груня марто кода ульнесь, истя кадовсь. Кудонь-кардазонь ды пирень тевтне мольсть эсест киява, седе ламо, сеедьстэ – каштмолезь. Теезель, мерян апак покшкавтне, ютазь шканть перть аволь аламо.

Ветявтынек газ. Калавтнинек каштомонок. Сонзэ таркас теинь лия нупальне – пидема-панема, ярсамо ужине. Копачинек ташто, сыредеяк сыре кудочапонть пластикень валдо лазсо, сайдинг мерить тензэ. Вельтинек кудолатонок сэнь жестьсэ… Саты, маряви. Каня зняро иень перть «изнявксонок» педе-пес ледстявить? Теяк, кинень сынь, неть «сявордозь» тевтне, эрявить, лиянень, кинень?

Ней икельганок поркснезь асфальтонь кияванть эрьва эскелицясь киртясынзе эскельксэнзэ, полгарьгавтсынзе сельмензэ сэнь-валдо, сэнь-пиже кельсэ кортыця «дворецэнек» лангс. Те вечкеви, рашты потсон валдо, кенярксонь мельть-арсемат. Эно кода эрямс, шешкемс мода кеняркстомо? Мезень кис сакшномс эрямонь паксянтень? Удомо ды пекень пештеме?

Кемень-кеветее иень телетне-кизэтне челькевтеме эзть юта эсенек ютксояк. Мон ды Паксютонь Груня теевинек вейкенек-вейкенек туртов седеяк лездыця, седеяк чарькодиця ялгакс. Бажинек стака шкатнестэ аравтомс вейкесь омбоцентень лавтов. Истя, тевсэ-мелявкссо, кеняркссо-ризкссэ, кивчк ютасть, теевсть ледстнемакс аволь аламо иетне.

Черькайтнень арась урныгаест. Арасель сеть иетнестэяк. Сонтемензэ, содавикс тевесь, – стака. Те кода умонь шкатнестэ кадовомс лишмевтеме. Истятнэнь ломанькс эзть лово велесэнть. Секс Черькайтненень, васняяк Натальнень, аволь чуросто эрявкшнынь: тень ускомс, тонань…

Саемс тунда ошсто велев самонть. Ярсамопельть ускома, эрьва кодат курмот-кармот, сыньгак эрявить… Таштавить аволь аламо. Ардт, ускомат… А редясак, прядови якстере кизэсь, мельганзо, ванат, бизмолды, тарка вешни, сёксесь. Аламонь-аламонь анокстама ошов, телень кудов. Мелявкстнэде прявелькска! Пурнамат, ильтямат: чурькат, модамарть, помидорт, умарть, торлат, эрьва мезе марто эрьва кодат банкат… Ведьгемень вайгельпетнень истямо канст марто а эскелясыть. Лишмесэяк, кода икеле, а усксыть. Ёмасть сетнеяк. Эряви мезеяк сынст полавтыця. Монь – «Нива». Мезе седе вадря? Аволь урныгай – пача, эрьва кува юты, ускияк… Аволь весть, аволь кавкстькак эмежень-умарень кансттнэнь, тундонсетнеде башка, «кандтнесь» лишмень вийсэнзэ «телень кудов» самай те урныгаесь.

Седе сеедьстэ Наталь марто – эряволь меремс Наталь патяй, сон кеменьшка иеде, тагояк ледстяса, мондень покш – ардтнинек кизэнь куншка, кстыень кенерема шкасто, Валдайвелев, буйкуншкань найманов.

А содан мекс, «патяй» валось удемезэнь совамо эзь капша. Мекс – а содан… Мекевлангт, сон айгсь, васолгавтсь эйстэнь аванть. «Кодамояк а патяй!» – сеересь мештесэнь кодамо-бути кольнякай вайгель. Тевесь, бешом, аволь свал ансяк иетнесэ. Улить ёнкст, ёжот, онкст, конатне сынст лангс а ваныть.

Талай эзь чулгово тень, мекс те лемесь монь иетнень а кунсолы, сеедьстэ совси пряудемезэнь, мукшны эстензэ лембе таркине ды бизны эйсэнзэ, теке чаво кедьгес понгозь промо.

Шкань ютазь панжия тувталонть…

Кувать кандтнинь, усксинь, лездынь мейсэ маштынь «Нивасо» вакссон ардтницянтень, те, монень марявсь, моданть-масторонть лангсо весемеде мазый-гайгиця лементень, чамантень, рунгонтень вейкень кис – сон эрясь седейсэнь эсензэ сэтьме эрямосо.

Ламоксть ардтнинек мартонзо ошов, седеяк ламоксть – найманов ды лияв-ков. Зяроксть? Каня ловови! Ды, мерема, тевесь тень эйсэ? Мельсэньгак арасель – ловомс. Усксинек мезе эряви ошов, мезе эряви, сеедьстэ кой-кодат ярсамопельть, – ошсто велев. Вечкевсь мартонзо ардтнемс, мель витсь, мезеяк а мерян.

Велеванть, эзь саво учомс, ёвтасть тень, срадсть-якасть лисьмалангонь келят-мелят. Истя-истя, келя, Паксютонь Алё-Алексей, мазый кудонь теицясь, Черькай Наталь марто тапсеви. Мезть ансяк эзть мендеря! Келесь, кода кортыть, ловажавтомо – сизема тунь а соды, мезе мелезэ, сень банговты. Ули текенень валмеревкскак: эрьванть кургонзо а потомдасак.

Те – келят.

Ёвтнемс, кода ульнесь, тунь апак сёпо?

Ёвтнеса.

Васняяк кодаткак «тапавкст» ютксонок – видьстэ мерезь, вейсэ, ве таркасо удсемат-кеверькшнемат – арасельть. Сёпомадо, эсь прянь идемадо мельгак превзэнь эзь сакшно. Паряк, видькстан, зяро иень перть тень эйскак пачкодевлинек… А содан… Мезть а эрсить эрямосонть… Мон виздинь теемс эскелькс малавгадомантень, пелинь. Кирдинь неть мельтнень потсон. Кекшезь кирдинь. Ёжодон Натальнень вестькак эзинь ледстне, «вечктян» валось кургстон эзь лисне. Вестькак эзия пала, эзия кутморда.

Аволь весть стардокшныя Наталень кудосо эли кузтемпесэ-пиресэ ськамонзо, Теряй лелявтомо. Аволь чуросто пси читнестэ пельсштапо. Ды мезе? Вадря, улиндеряй мелем, путы чай, кофе, аламошка калякатано теде-тонадо ды – вастомазонок! Вана кода ульнесь алкукс.

Истя кемень иеде ламо вечкинь салава, эсь пачкан, кекшнинь вечкемам вечкевиксэнь эйстэ, Натальде.

Лездынь урныгайсэнь. Лиясо-мейсэ. Чинь-колмонь ютазь совсинь варштамо, кортнеме Теряй лелянь марто. Кой-зярдо кулялопань, телевидениянь материалтнэнь, масторсонок молиця тевтнень кувалма пачколинек мартонзо пси пелькстамос. Мерема, Теряй лелям маштсь марязентень, ловнозентень эли неезентень виде питнень путомо, «сэвтнеме», явномо-путнеме. Маштсь диалогонь ветямо. Превей атясь, мезть кортамс. Лия марто Пичелесэ а кинь марто ды а мезде кортамс, а кинень пшкадемс. Сон – ськамонзо. Кулозь веле. Каня алкукс велетне весе истят? Мекс истямос пачкодсть? Кие чумось? Кияк арась? Эли аламонь-аламонь чумотано весе? Улиндеряй весе – те, лисни… кияк. Эрси-арась истя?